Вадим Колтовской кикбоксиҥҥа Россия чөмпүйүөнэ буолла

Кикбоксер Вадим Колтовской Россия чөмпүйэнээтигэр К–1 дисциплинэҕэ кыһыл көмүс мэтээли ылары ситистэ. Бу туһунан «Саха» НКИХ иһитиннэрэр.

«Колтовской Вадим – К-1 кикбоксиҥҥа 57 киилэҕэ Россия чөмпүйүөнэ», – диэн Уһук Илиҥҥи уокурук уонна Саха сирин сүрүннүүр тренерэ Андрей Алексеев бэйэтин Instagram акаунугар суруйда.

Саха сирин түөрт спортсмена бириистээх миэстэҕэ тигистэ: Айаал Местников (54 кг.) Лоу–кик дисциплинэҕэ үрүҥ көмүс мэтээли ылла, Виталий Филиппов (67 кг) уонна Петр Васильев (51 кг) Лоу–кик дисциплинэҕэ уонна Юлия Петрова (56 кг) К–1 дисциплинэҕэ боруонса мэтээл хаһаайыттарынан буоллулар.

Россия кикбоксиҥҥа чөмпүйэнээтэ балаҕан ыйын 2-7 күннэригэр Ульяноск куоракка «Волга–Спорт–Арена» спорт дыбарыаһыгар ааста. Дойду 48 регионуттан 600-тэн тахса спортсмен лоу-киктаах фулл–контакт, фулл–контакт, К–1, поинтфайтинг, лайт–контакт, сольнай композициялар дисциплиналарынан кыттыыны ыллылар.