Верхоянскайга уонна Баатаҕайга 1-9 кылаас үөрэнээччилэригэр актированнай күн биллэрилиннэ

Күн-дьыл көрдөрүүтэ -50 кыраадыстан алараа тымныйыытынан сибээстээн, Верхоянскайга уонна Баатаҕайга маҥнайгыттан тохсус кылааска диэри үөрэнэр оҕолорго үөрэх күнэ уураттылынна.

«Бүгүн биһиэхэ -52 кыраадыс тымныы, 1-9 кылаас үөрэнээччилэригэр үөрэх күнэ ууратылынна», –диэн Верхоянскай орто оскуолатын дириэктэрин эбээһинэһин толорооччу Галина Дабанова тириэрдэр.

Баатаҕайга эмиэ бүгүн оҕолор үөрэммэттэр.

«Порт оройуонугар -51 кыраадыс тымныы бэлиэтэннэ, бөһүөлэк оннооҕор намыһах сиргэ турар. Манна термометр чахчы көрдөрүүтэ -54 кыраадыс тымныыга тэҥнэһэр. Маҥнайгыттан тохсус кылааска диэри сарсыардааҥҥы солбуур үөрэнээччилэригэр үөрэх күнэ ууратылынна. Олохтоох бириэмэнэн 11.00 чааска киэһээҥҥи солбуур үөрэнэ кэлэрэ быһаарыллыа», – диэн Баатаҕай орто оскуолатыттан иһитиннэрэллэр.

Бэҕэһээ, сэтинньи 25 күнүгэр Баатаҕай оскуолатын маҥнайгыттан сэттис кылааска диэри үөрэнээччилэригэр эмиэ актированнай күн биллэрилибитэ.