VI Илиҥҥи экономическай форум Владивостокка 2020 сыл балаҕан ыйын 2–5 күннэригэр ыытыллыа

VI Илиҥҥи экономическай форум 2020 сыл балаҕан ыйын 2-5 күннэригэр Владивосток куоракка Уһук Илиҥҥи федеральнай үнүбэрситиэт былаһааккатыгар ыытыллыа. Бу туһунан форум пресс-сулууспата иһитиннэрэр.

«Форум норуоттар икки ардыларынааҕы торум уонна араас өрүттээх бииргэ үлэлэһии сайдыытын сүрүн былаһааккатынан буолла. Манна сыл аайы Азия регионун дойдуларын баһылыктара мустан, аан дойду экономикатын сүрүн боппуруостарын дьүүллэһэллэр. Инникитин да форум инвестициялары тардар өрүтүн илдьэ сылдьыа диэн эрэнэбин», — диэн Россия бэрэсидьиэнин сүбэһитэ, Илиҥҥи экономическай форум тэрийэр кэмитиэтин сэкэрэтээрэ Антон Кобяков бэлиэтээтэ.

Илиҥҥи экономическай форум Владимир Путин 2015 сыл ыам ыйын 19 күнүнээҕи ыйааҕынан, Уһук Илин экономикатын сайыннарар уонна Азия регионун дойдулара икки ардыларынааҕы бииргэ үлэлэһиилэрин кэҥэтэр сыаллаах сыллата ыытыллар.