«ВИС» тэрилтэ Саха сиригэр 18,6 миллиард солкуобайдаах культурнай кластер тутуоҕа

НВК САХА — «ВИС» тэрилтэ Дьокуускай куоракка 18,6 миллиард солкуобай сыаналаах улахан культурнай кластер оҥоруу инвестора буолуоҕа. Кластер филармонияны, эпос киинин уонна икки национальнай тыйаатыры түмүө. Бу туһунан Сөбүлэһиини Саха сирин Ил Дархана Айсен Николаев уонна «ВИС» тэрилтэ дириэктэрдэрин сэбиэтин чилиэнэ Сергей Ромашов Илиҥҥи форумҥа баттаатылар.

Сөбүлэһии мэктиэтинэн «ВИС» тэрилтэ бырайыак — инвестора,  бырайыактааччыта уонна тутуу үлэтин ыытааччыта. Эбийиэк үлэҕэ киирбитин кэннэ 8 сыл устата техническэй туһаныытын ыытыаҕа.

«Барыллаан ааҕыы быһыытынан культурнай кластер оҥоруута 10 миллиард солкуобайга сыаналанар. Судаарыстыба уонна чааһынай кыттыгас уопсай сыаната 18,6  миллиард солкуобайга тэҥнэһэр», – диэн хампаанньа пресс-сулууспата тириэрдэр.

Үбүлээһин төлөбүрэ 11 сылга наарданан ыытыллыаҕа. Бу суумаҕа бырайыактааһын, тутуу үлэлэрэ уонна кэлиҥҥи техническэй туһаныытын ыытыы ороскуоттара барыта киирэ сылдьаллар.