Владимир Пермяков Сеулга бразилиятааҕы джиу-джитсу турнирын чөмпүйүөнэ буолла

Саха сирин бразилиятааҕы джиу-джитсу көрүҥүн кулуубун үөрэнээччитэ Владимир Пермяков, Кореяҕа ыытыллыбыт Abu Dhabi International Pro Jiu-Jitsu Championship норуоттар икки ардыларынааҕы турнирга, 69 киилэҕэ диэри ыйааһыҥҥа кыайыыны ситистэ. Бу туһунан «Спорт Якутии» иһитиннэрэр.

Саха бөҕөһө ыарыылаах ньыманы туһанан, АХЧ уонна Корея кытааччыларын үстэ болдьох иннинэ кыайда диэн бэлиэтэнэр.

«Доҕотторбун уонна тренердарбын бу турнирга бэлэмнэнэрбэр көмөлөспүттэрин иһин махтанабын. Ахсынньы 7-8 күннэригэр ыытыллыахтаах IBJJF International Seoul Open кыттыахпын баҕарабын. Өйөбүл баар буоллаҕына, кыайыыбын чиҥэтэн өссө биир кыһыл көмүс мэтээли ылар баҕа санаалаахпын», — диэн Владимир Пермяков эттэ.

Маны тэҥэ чөмпүйэнээккэ Евгений Колодезников 77 киилэҕэ диэри ыйааһыҥҥа түөрт киирсиигэ кытынна.