Владимир Путин Россия Төрүт сокуонугар киирэр уларытыылары талыы куоластааһынын күнүн бигэргэттэ

Россия бэрэсидьиэнэ Владимир Путин «Россия Төрүт сокуонугар киирэр уларытыылары талыыга бүтүн дойду куоластааһынын күнүн анааһын туһунан» ыйааҕы бигэргэттэ. Бу туһунан ТАСС тириэрдэр.

Россия олохтоохторо бүтүн дойду куоластааһыныгар «Россия Федерациятын Төрүт сокуонугар киирэр уларытыылары өйүүгүт дуо?», — диэн ыйытыкка эппиэттиэхтэрэ.

Дойду Төрүт сокуонугар киирэр уларытыылары талыыга бүтүн дойду куоластааһына олохтоммут эпидемиологическэй усулуобуйаттан көрөн, муус устар 22 күнүттэн хойутуу ыытыллыан сөбүн Владимир Путин бэлиэтээтэ.

Россия бэрэсидьиэнэ Киин быыбардыыр хамыыһыйа баһылыгар куоластааһын күнүнэн муус устар 22 күнүн бигэргэппитин туһунан иһитиннэрдэ. Маны тэҥэ сокуоҥҥа олоҕуран, ыйаах тахсыаҕыттан биир ый ааспытын эрэ кэннэ куоластааһын ыытыллыахтааҕын, ол эрээри хойутуу хаһан ыытыллыан сөбө ыйыллыбатын эттэ.

«Аан дойду үрдүнэн олохтоммут уустук эпидемиологическай усулуобуйаны учуоттаан туран уонна ыарыы вируһа биһиги дойдубутугар эмиэ бэлиэтэммитинэн сибээстээн, куоластааһын маннык тэрээһиннэри ыытар кыах баар эрэ буоллаҕына ыытыллыаҕа», —  диэн Владимир Путин тоһоҕолоото.

Төрүт сокуоҥҥа киирэр уларытыылар суолталаахтарын үрдүнэн, «нэһилиэнньэ доруобуйатыттан уонна олоҕуттан ураты ордук суолталаах туох да суох». «Олохтонор усулуобуйаҕа олоҕуруохпут», — диэн дойду баһылыга иһитиннэрдэ.