Владимир Путин Шахтер күнүнэн эҕэрдэлиир

НВК САХА – Россия бэрэсидьиэнэ Владимир Путин чох бырамыысыланнаһын үлэһиттэрин уонна бэтэрээннэрин Шахтер күнүнэн эҕэрдэлээтэ. Бу туһунан РИА Новости суруйар.

Быйыл дойдуга Шахтер күнэ атырдьах ыйын 25 күнүгэр бэлиэтэнэр.

“Чох хостооһунугар билигин үлэлии сылдьар, бэтэрээннэри, кинилэр дьиэ кэргэттэрин кэлэн иһэр бырааһынньыгынан эҕэрдэлиибин уонна туох баар үтүөнү баҕарабын. Чох хостооһунун кытта олохторун ситимнээбит дьоҥҥо өссө биирдэ этиэм этэ, эһиги үлэҕит дойдубут экономикатын сүрүн салааларыттан биирдэстэрэ буолар. Горняк уустук үлэтэ дойдубутугар ытыктанар, оттон шахтер кытаанах майгыта көлүөнэттэн көлүөнэҕэ бэриллэр”, – диэн атырдьах ыйын 22 күнүгэр чох хостуур регионнар баһылыктарын кытта көрсүһүүгэ Путин иһитиннэрдэ.

Дойдубут хоһуун санаалаах, өһөс майгылаах, дьаныардаах хайа үлэһиттэринэн киэн туттар диэн Путин эттэ. Шахтер династиялара бу үтүө үгэһи бигэргэтэллэрин ыйда.

Владимир Путин атырдьах ыйын 22 күнүгэр күбүрүнээтэрдэри, министиэристибэ салайааччыларын кытта чох бырамыысыланнаһын туһунан ырытта.

Бу иннинэ чох хостооһунугар үлэлиир дьон социальнай кыһалҕаларын быһаараары, кэккэ дьаһаллары биэрбитэ.