Владимир Путин түүҥҥү саататар тэрээһиннэри тохтоторго соруйда

Россия бэрэсидьиэнэ Владимир Путин регионнарга түүҥҥү саататар, сынньалаҥ кииннэр уонна уопсастыбаннай аһы-үөлү тэрийэр эбийиэктэр үлэлэрин 23.00 чаастан 06.00 чааска диэри тохтоторго соруйда. Бу туһунан РИА Новости иһитиннэрэр.

Туһааннаах сорудахтар испииһэгэ Кремль саайтыгар таҕыста.  

Докумуон быһыытынан, тырааныспар бары көрүҥнэригэр санитарнай-эпидемиологическай миэрэлэри тутуһуу хонтуруола күүһүрүөҕэ: тимир суол, массыына уонна салгын тырааныспарыгар, ону тэҥэ таксига, элбэх дьон сылдьар сирдэригэр дезинфекцияны көрүөхтэрэ.

Ону таһынан, Владимир Путин 60-тан үөһээ саастаах үлэлиир дьону түөрт нэдиэлэ устата вакцинацияны ааһарга уонна иммунитеты үөскэтэр туһугар дистанционнай көрүҥҥэ көһөрөргө сорудахтаата.