Волонтердар бырабыыталыстыба массыыналарынан күҥҥэ 50-тэн тахса көмө оҥороллор

Волонтердар өрөспүүбүлүкэ бырабыыталыстыбатын масыыналарынан олохтоохторго күҥҥэ 50-тэн тахса көмө оҥороллор. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

«Олус элбэх сайаапка киирэр, волонтердар күҥҥэ 50-тэн тахса сырыыны оҥороллор. Бырабыыталыстыба массыыналара биһиэхэ улахан көмө буолаллар», — диэн волонтердар өрөспүүбүлүкэтээҕи координатордара Алена Кычкина эттэ.

Сайаапкалар төгүрүҥ күн устата тохтоло суох үлэлиир суһал нүөмэргэ киирэллэр: 8-800-200-34-11.

Волонтердар үксүн бородуукта уонна эмп-том тириэрдэллэр.

Коронавирус инфекцията тарҕаныытын сэрэтэр миэрэлэринэн биллэриллибит бэйэ изоляциятын кэмигэр 60-тан аҕа саастаах дьоҥҥо уонна маҥнайгы группалаах инбэлииттэргэ көмө оҥорорго СӨ бырабыыталыстыбатын автобазатын «Газель», «Форд-фокус» уонна «УАЗ-Патриот» массыыналара бэриллибиттэрэ.

Инники этиллибитинэн, Ил Дархан Айсен Николаев соругунан өрөспүүбүлүкэ бырабыыталыстыбатын массыыналара медицинскэй тэрилтэлэр уонна волонтердар ыытар үлэлэригэр көмө оҥорорго бэриллибиттэрэ.