ВТБ баан Саха сиригэр 480 мөлүйүөн солкуобайга 2 % -наах чэпчэтиилээх ипотеканы бигэргэттэ

Саха сиригэр Уһук Илиҥҥэ чэпчэтиилээх ипотека бырагырааматын иитинэн 480 мөлүйүөн солкуобай суумалаах 120 сайаапканы ВТБ баан бигэргэттэ. Бу туһунан ВТБ баан пресс-сулууспата иһитиннэрэр.

«Саха сиригэр дьиэ тутуутун ырыынага тэтимнээхтик сайда турар, быйыл өрөспүүбүлүкэ Арктикатын улуустарыгар элбэх кыбартыыралаах дьиэлэри тутан саҕалыахтара. Онон Уһук Илиҥҥи чэпчэтиилээх ипотека ирдэбилэ улахан, өссө да элбэх дьиэ кэргэн бэйэлэрэ дьиэлэнэр кыахтанныахтара», — диэн ВТБ баан Уһук Илиҥҥэ салайааччыта Денис Леонтьев эттэ.

Уһук Илиҥҥэ 2 % -наах чэпчэтиилээх ипотека бырагырааматынан ВТБ баан 500-тэн тахса сайаапканы бигэргэтэн, хайыы үйэ 300 мөлүйүөн солкуобайтан тахса суумалаах 100-кэ сөбүлэһии түһэрсибит. Уопсайа 3,3 миллиард солкуобай суумаҕа тэҥнэһэр 850-ча сайаапка киирбит.

Бу бырагыраама иитинэн 36-гар диэри саастаах дьиэ кэргэттэргэ, эбэтэр 18-гар диэри саастаах аҥардас төрөппүккэ муҥутаан алта мөлүйүөн солкуобай суммалаах, 20 сылга диэри болдьохтоох, бэриллэр суума 20 %-гар тэҥнэһэр маҥнайгы төлөбүрдээхх 2 %-наах чэпчэтиилээх кирэдьиит бэриллэр. Бырагыраама үлэлиир болдьоҕо 2024 сыл ахсынньы 31 күнүгэр диэри.

Рейтинг көрдөрөрүнэн, Саха сирэ ипотека ылыы көҕүнэн Уһук Илиҥҥэ Приморскай (563 мөлүйүөн солкуобай) уонна Хабаровскай (392 мөлүйүөн солкуобай) кыраайдары кытта тэҥҥэ үс бастыҥ регион кэккэтигэр киирэрин баан бэлиэтиир.

Санатар буоллахха, 2019 сыл балаҕан ыйыгар Владимир Путин бырагырааманы биэс сылга болдьохтоох саҕалыыр туһунан эппитэ. Дойду бэрэсидьиэнигэр бырагыраама бырайыагын Уһук Илини уонна Арктиканы сайыннарыыга миниистирэ Александр Козлов киллэрбитэ.