Вячеслав Алексеев: Төрүт сокуоҥҥа уларытыыга 100-тэн тахса этиини регионнар киллэрдилэр

Дойду Төрүт сокуонугар 100 тахса уларытыыга этиини регионнар киллэрдилэр. Бу туһунан Ытык Сүбэ чилиэнэ Вячеслав Алексеев кэпсээтэ.

«Регионнартан этиилэр киирэллэр эрээри, бу бэрэсидьиэн көҕүлээһинэ. Кини 75 киһилээх үлэлиир бөлөҕү тэрийбитэ уонна бэйэтин бырайыагын киллэрбитэ. 100-тэн тахса этии киирбит эрээри, үксэ атын ыстатыйалары уларытыыга сыһыаннаах. Бэрэсидьиэн этиитинэн, уларыйыы 137 ыстатыйаттан 22-гэ киллэриллиэхтээх. Ол эбэтэр чопчу ыйыллыбыт ыстатыйалар уларыйыахтаахтар», — диэтэ Алексеев.

Санатан эттэххэ, Конституцияҕа уларытыылары киллэрэр эбэтэр киллэрбэт туһунан норуот куоластааһына быһаарыахтаах. Бүтүн Россия үрдунэн ыытыллар куоластааһын барыллаан муус устар 12 күнүгэр эбэтэр 26-гар ыытыллыан сөп диэн Кириэмилгэ быһаараллар. Санаттахха, төрүт сокуоҥҥа уларытыылары киллэрэр туһунан бэрэсидьиэн Владимир Путин федерация мунньаҕар быйылгы туһаайыытыгар этэн турар.