Вячеслав Бродников ойуур баһаарын хайдах умуруоралларын ютубка көрдөрдө

НВК САХА – Саха сирин биллэр блогера Вячеслав Бродников YouTube ханаалыгар Эдьигээн оройуонугар ойуур баһаарын умуруоруу үлэтин көрдөрдө.

Вячеслав Бродников Эдьигээн ойуурун хаһаайыстыбатыгар үлэлиир. Видеоҕа Бааханай нэһилиэгин аттыгар баһаарын умуруорууну устубут.

«Билигин баһаарга утары уоту ыытан, өрүскэ сыҕайа сатыахпыт. Утары ыытар уоппут ойуур баһаарын кытыытыттан көнө буолуоҕа. Субу умайбыт оту умуруорар быдан чэпчэки», – диэн кэпсиир блогер.

Биир суукка иһигэр видеону 60 тыһыынчаттан тахса киһи көрбүт. Санатан эттэххэ, Вячеслав Бродников балыктааһын туһунан ханаалыгар 160 тыһыынчаттан тахса сурутааччылаах. Кини YouTube үрүҥ көмүс кнопкатын хаһаайына.