Юрий Трутнев «Саюри» тэпилииссэ комплексыгар сырытта

Ил Дархан Айсен Николаев уонна дойду бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев төгүрүк сыл устата быстала суох үлэлиир «Саюри» тэпилииссэлэргэ сырыттылар. Бу туһунан СӨ Баһылыгын уонна бырабыыталыстыбатын пресс-сулууспата иһитиннэрэр.

Сыырдаах бөһүөлэгэр төгүрүк сыл үлэлиир «Саюри» саҥа тэпилииссэлэргэ оҕурсуну, помидору уонна күөх үүнээйилэри 1,3 га иэннээх сиргэ үүннэрэллэр. Тутуу үһүс уочарата олоххо киирдэҕинэ, 3,3 га сиртэн сылга 1900 тонна оҕуруот аһын ылар кыахтаныахтара.

Тэрилтэ билигин дьоппуон технологиятынан оҥоһуллубут үс араҥалаах анал бөлүөҥкэнэн бүрүһүөннэммит түөрт теплицаны үлэлэтэр. Бу бүлүөнкэ күн сырдыгын 94 %-нын киллэрэр буолан, таас түннүктээҕэр лаппа ордук. Тэпилииссэ килиимэтин көмпүүтэр нөҥүө салайаллар, ону тэҥэ сиигирдэр гидропоннай систиэмэни туһаналлар.