Юрий Трутнев: Төрүт сокуон уларытыылара Россияны өссө күүһүрдүөхтэрэ

Россия бэрэсидьиэнин Уһук Илиҥҥэ боломуочунай бэрэстэбиитэлэ, вице-премьер Юрий Трутнев этиитинэн Төрүт сокуон уларытыылара киирдэхтэринэ — Россия өссө күүһүрүө.

«Төрүт сокуон биир региоҥҥа эрэ анаммыт буолбатах, бүтүн дойдуга аналлаах. Онон тус бэйэм саҥа уларытыыларга, дойду территориальнай тутула бөҕөргүүрүн, Россия бырааба аан дойду сокуоннарытан күүстээх буоларын бэйэбэр бэлиэтиибин. Россия — сувереннай судаарыстыба буоларын быһыытынан сокуона күүстээх буолуохтаах» — диэн вице-премьер иһитиннэрдэ.

Боломуочунай бэрэстэбиитэл бэйэтэ бэс ыйын 29 күнүгэр, бэнидиэнньиккэ Москва биир быыбардыыр учаастагар куоластаата.

Төрүт сокуоҥҥа уларытыылары киллэрии куоластааһына дойду бары регионнарыгар бэс ыйын 25 күнүттэн саҕаламмыта. От ыйын 1 күнүгэр түмүктэниэхтээх. Бүтүн Россиятааҕы уопсастыбаннай санааны чинчийэр киин көрдөрүүтүнэн, түөрт күн иһигэр ыйытыкка кыттыбыт дойду олохтоохторун 75 %-на Төрүт сокуоҥҥа киирэр уларытыылары өйөөтө.