Юрий Трутнев: Уһук Илин губернатордара инвестбырайыактары хонтуруолга ылаллара ирдэнэр

Россия бырабыыталыстыбатын бэрэссэдээтэлин солбуйааччыта, Россия бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев Уһук Илиҥҥи регионнар губернатордарын кытта улахан инвестиционнай бырайыактары олоххо киллэрэр инвестордары өйөөһүн боппуруостарынан мунньах ыытта. Бу туһунан Уһук Илиҥҥи федеральнай уокурук боломуочуйалаах бэрэстэбиитэлистибэтин пресс-сулууспата иһитиннэрэр.

Күн бүгүн Уһук Илиҥҥэ судаарыстыба өйөбүлүнэн 2,4 тыһыынчаттан тахса инвестиционнай бырайыак олоххо киириэхтээх. Россия илиҥҥи сайдыыга министиэристибэтин ураты кэтэбилигэр уопсайа 5,2 триллион солкуобай кээмэйдээх инвестициялаах 50 улахан бырайыак сылдьар. Бу 50 бырайыак барыта олоххо киирдэҕинэ 80 тыһыынчаттан тахса үлэ миэстэтэ эриллэрэ былааннанар.

«Улахан инвестиционнай бырайыактары олоххо киллэрии федеральнай да, региональнай да көмөнү уонна өйөбүлү ирдиир. Онон губернатордар бырайыактар хаамыыларын тус бэйэлэрин хонтуруолларыгар ыллаллара ирдэнэр. Социальнай эбийиэктэри тутууга национальнай бырайыактар чэрчилэринэн эбии үп-харчы көрүллэр да түгэнигэр, социальнай эйгэни сайыннарыыга уонна өйөөһүҥҥэ регион бүддьүөтүттэн көмө син биир ирдэнэр», – диэн Юрий Трутнев биллэрдэ.

Федеральнай таһымҥа инвестордары өйөөһүн хаамыылара бэлэмнэммиттэрэ этиллэр, бу бастатан туран — урутаан сайдыы территорияларын уонна Владивосток көҥүл пордун эрэһиимэ, ону тэҥэ инфраструктураны тэрийиигэ субсидиялар буолаллар. Россия илиҥҥи сайдыыга министиэристибэтин көрдөрүүтүнэн, инвестордар үгүс өттүлэрэ социальнай инфраструктураны тэрийиигэ уонна сайыннарыыга өйөбүлгэ наадыйаллар.

Министиэристибэ баһылыга Александр Козлов улахан инвестиционнай бырайыактары олоххо киллэрэр экономическэй сайдыы барар сирдэригэр, социальнай инфраструктураны тутууга уонна саҥардыыга «Биир кэлим субсидия» механизма көдьүүстээҕин туһунан Уһук Илин губернатордарыгар санатта.