Захар Никитин: Конституцияҕа култуураны харыстааһын киирбитэ олус хайҕаллаах

А. Д. Макарова аатынан Дьокуускайдааҕы культура уонна искусство колледжын директора, республика культуратын уонна искусствотын үлэһиттэрин айар сойууһун бэрэссэдээтэлэ, педагогическай наука кандидата Захар Никитин Конституцияҕа уларытыылары киллэрэр наадатын бэлиэтээтэ. Киллэриллибит уларытыыларга культура эйгэтин быһаччы таарыйар саамай суолталаах этиилэри ааттаата. Маннык этиилэр РФ Конституциятын икки ыстатыйатыгар – 68-с уонна 69-с ыстатыйаҕа бааллар. «68-с ыстатыйаҕа эбии «Российскай Федерация элбэх омуктаах норуотун нэһилиэстибэтин, культуратын судаарыстыба өйүүр уонна харыстыыр» диэн этиллэр. Мин көрдөхпүнэ, судаарыстыба өйөбүлүн уонна харыстааһын Конституциятыгар киллэрии – нэһилиэнньэ социальнай өйөбүлүн дьаһалларын бигэргэтии курдук дьоһун хардыы. Киһи материальнай да, духуобунай да өрүтэ дьүөрэлии сайдарыгар көмөлөһөллөр», — диэн Никитин бэлиэтээтэ.

«Судаарыстыба норуоттарын уонна этническэй уопсастыбаларын культурнай уратыларын көмүскүүр, культураларын уонна тылларын оннунан хаалларыыны мэктиэлиир» диэн пуун 69- с ыстатыйатыгар эбэргэ этии киллэрдэ. «Бу олус суолталаах түгэн, билигин ити мэктиэлэр биһиги судаарыстыбабыт сокуонугар суруллуохтара, кинилэри Конституционнай суут нөҥүө да туруулаһыахха сөп», – диэн Захар Никитин түмүктээтэ.