Жатайдааҕы суудуна верфэтин саҥатытан оҥорууга 3,55 млрд солк ыытыахтара

Жатайдааҕы суудуна верфэтин күүһүн улаатыннарарга уонна саҥатытан оҥорууга 2020-2021 сылларга федеральнай хааһынаттан 3,55 миллиард солкуобайы ыытыахтара. Бу туһунан ТАСС иһитиннэрдэ.

Бу курдук дааннайдар 2020 сыллааҕы уонна 2021-2022 сылга диэри РФ федеральнай бүддьүөтүн бырайыагар киирбиттэр. Жатайдааҕы суудуна верфэтэ хампаанньа устааптаах хапытаалыгар судаарыстыбаттан усунуос быһыытынан үбүлэниэ.

«Жатайдааҕы суудуна верфэтэ» акционернай уопсастыба устааптаах хапытаалыгар усунуоһу төлүүргэ ороскуот үрдээбитинэн «Гражданскай суудунаны тутуу күүһүн улаатыннарыы уонна салаа материальнай-техническэй базатын сайыннарыы» бырагыраама үбүлээһинэ 2020 сылга 2 450 миллиард солкуобайынан, 2021 сылга 1 106,2 миллиардынан улаатта», — диэн иһитиннэриигэ этиллэр.

Суудуна верфэтигэр үрдүк технологиялаах тэрилтэ оҥоһулларыгар бу үп-харчы тыырыллыаҕа. Жатайдааҕы суудуна верфэтин 2021 сылга саҥатытан оҥорон бүтэрэр былааннаахтар.

Тэрилтэ саҥардан тутуута 5,75 миллиард солкуобайга тэҥнэһиэхтээх. Онтон 750 мөлүйүөн солкуобайын суудуна верфэтэ номнуо 2016-2018 сылларга бэйэтин источнигыттан укпут.