Жатайга өрүс ханаалын дириҥэтэр үлэлэр ыытыллаллар

НВК САХА — Жатай бөһүөлэгин пуордугар өрүс ханаалын дириҥэтэр үлэлэр төгүрүк суукканан ыытыллаллар. Бу туһунан «ЛОРП» пресс-сулууспата иһитиннэрэр.

«Балаҕан ыйын 10 күнүттэн саҕалаан өрүс ханаалынан 1 килэмиэтир курдук арыттаах сири бардыбыт. 30 тыыһыынча куб кэриҥэ уу түгэҕин кырса хостонно. Өссө 1200 миэтэрэ усталаах сиргэ дириҥэтии үлэтэ ыытыллара турар», — диэн «Бүлүү» уу түгэҕин дириҥэтэр үлэни ыытар суудуна хамандыыра Сергей Лукка кэпсээтэ.

Үлэ сүрүн соруга өрүс ханаалын 2,5 миэтэрэ дириҥнээх буоларын гына оҥоруу диэн бэлиэтэнэр.

«Нефтебазаҕа авиация оттугун өрүһүнэн тиэрдиини уонна өрүс флотун 100-чэкэ суудуната кыһыҥҥы тохтобулга киирэллэрин хааччыйыыны оҥоруохпутун наада», — диэн «ЛОРП» кылаабынай инженерэ Виктор Шадрин эттэ.

Инники этиллибитинэн, Өлүөнэ өрүскэ уу таһыма намтаан Жатай пуордугар баар нефтебазаҕа авиация оттугун тиэрдии быстыбытыттан сылтаан Айсен Николаев ыксаллаах балаһыанньаны биллэрбитэ.