Ньурбаҕа элбэх оҕолоох ыаллар учаастактарыгар уот тардалларын сэттис сылын күүтэллэр

Комментарии Горячая линия

Поделиться:

НВК САХА – Ньурба куоратын элбэх оҕолоох ыаллара бырааптара кэһилиннэ. “Үс уонна онтон элбэх оҕолоох ыаллары сиринэн хааччыйыы” бырагыраама чэрчитинэн саҥа учаастактары ылбыт дьон сэттис сылларын күүтүүлээх сирдэригэр уот кэлэрин күүтэллэр.

2012 сыллаахха Ньурба куоратыгар саҥа баар буолбут Березовка микрооройуоҥҥа элбэх оҕолоохторго анаан учаастактары биэрбиттэрэ. Ыаллар хайдах дьиэ тутталларын туһунан былаан бөҕөлөммүттэрэ. Ол эрээри күн бүгүнүгэр диэри манна уот да, суол да суох. Ол иһин учаастактарга аҕыйах дьиэ дьэндэһэн турар.

Ньурба куоратын олохтооҕо Николай Турантаев икки сыллааҕыта куорат киинигэр турар учаастагы ылбыт. Дьонтон генератор уларсан уоттанан, дьоҕус 5*5 иэннээх дьиэтин туттубут. Санаатахха, бу күн сарсын киириэх уот бүгүҥҥэ диэри тардыллыбакка турар, иннэ гынан баҕалаах чуумпу сиргэ турар дьиэтэ кураанахсыйбыта этэҥҥэ иккис сылыгар барда.

“Бастаан 2012 сыллаахха баҕаналары туппуттара, ол онон хаалла. Трансформатордар хахтара эрэ турар, ону ыйыталаспыппын, үчүгэйдик эппиэттээбэтэхтэрэ”, – диэн Николай кэпсээтэ.

Билигин бу дьыаланан тустаах уорганнар дьарыктана сылдьаллар. Березовкаҕа сир ылбыт элбэх оҕолоох ыаллар борокуратуураҕа үҥсэннэр, бэрэбиэркэ ыытылынна. Ол курдук 2013 сыллаахха уот ситимин тардан, инфраструктураны оҥоруохтаах тэрилтэ куорат дьаһалтатын кытта муниципальнай хантараак түһэрсибитэ билиннэ. 4 мөлүйүөн 174 тыһыынча солкуобай бэдэрээччиккэ түспүт, ол эрэн үлэ ситэ оҥоһуллубатах.

“Ньурба куоратын дьаһалтата Березовкаҕа уот тардар туһунан тутуу тэрилтэтин кытта муниципальнай хантараак түһэрсибитэ. Ол эрээри бэдэрээччит үлэни ситэ оҥорботох, ыйыллыбыт үбү-харчыны бүтүннүү ылбыт. Икки холуобунай дьыала тэрилиннэ”,- диэн улуус борокуруорун көмөлөһөөччүтэ Аина Кондакова эттэ.

Иннэ гынан силиэстийэлиир кэмитиэт дьыала көбүттэ. Манна тилэх баттаһа, ис дьыала силиэстийэлиир салаата эмиэ иккис дьыаланы тэрийдэ. Улуус борокуратуурата маны барытын хонтуруоллуур.



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

двадцать + 6 =

ЛЕНТА НОВОСТЕЙ