Өрөспүүбүлүкэ сиригэр-уотугар ойуур баһаардарын умуруоруу быйылгы холбоһуктаах былаана бигэргэннэ

Комментарии Общество и политика

Поделиться:

НВК САХА – Ойуур баһаарыттан сэрэхтээх буолууга ирдэниллэр сокуон-быраап аахталара, ол иһигэр, Саха сирин сиригэр-уотугар ойуур баһаардарын умуруоруу быйылгы холбоһуктаах былаана, бигэргэннэ диэн экологияҕа, айылҕаны туһаныыга уонна ойуур хаһаайыстыбатыгар министиэристибэ пресс-сулууспата иһитиннэрэр.

Бу былаан быһыытынан, ойуур баһаарын утары охсуһууга 3 тыһ. 807 киһи, 1 тыһ. 307 тиэхиньикэ туруоруллуоҕа. Сүүстэн тахса киһи, ол иһигэр муниципальнай уорганнар бэрэстэбиитэллэрэ, тыа баһаарын умуруорууга бэлэмнэниини аастылар.

«Авиалесоохрана» судаарыстыбаннай бүддьүөт тэрилтэтин байыастара «Ми-8» бөртөлүөттэн анал тэрилинэн түһүүгэ, «Ан-2» сөмөлүөттэн парашютунан ыстаныыга дьарыктаннылар. Барыта 793 дьарыктанар ыстаныы, 900 түһүү оҥоһулунна.

Ноҕурууска улахан буолан, тиэхиньикэ түргэнник эргэрэр. Ону саҥардан иһиигэ федеральнай киини кытары күүскэ үлэлиибит. Ол түмүгэр, «Экология» национальнай бырайыак чэрчитинэн үп көрүллэн, 28 араас баһаарынай тиэхиньикэ атыылаһары ситистибит. Билигин ол тиэхиньикэлэри хааччыйар хампаанньалары кытары хантараак түһэрсэ, илии баттаһа сылдьабыт.

Саха сирин баай хара тыата олус киэҥ, Россия ойуурун саппааһын биэс гыммыт биирин ылар. Ону барытын хонтуруоллуур уустук, билиҥҥи туругунан ойуурга турар уот 57 %-на сөмөлүөт, бөртөлүөт көмөтүнэн, 12 %-на Рослесхоз ыраахтан кэтиир приборунан булуллар.

Быйылгыттан видеокамералары туһаныахтара. Барыта 22 видеокамераны Бүлүү, Мэҥэ Хаҥалас, Нам, Ньурба, Кэбээйи, Таатта, Уус Алдан, Чурапчы улуустарыгар уонна Дьокуускай куоракка туруоруохтара. Биир видеокамера 20-ттэн 60 тыһыынча гектар иэннээх тыаны хабан көрөр, ханнык координакка уот турбутун, төһө иэннээх сири ылбытын быһаарар итиэннэ операторга тиэрдэр бырагыраамалаах.

Тыаҕа турар уот нэһилиэнньэлээх пууҥҥа суоһаабатын итиэннэ ойуур пуондатын сиригэр баһаар барбатын хааччыйар балаһаны тэрийэр сыалтан, баһаартан сэрэхтээх буолуу сезонын саҕаланыытыгар уонна түмүктэниитигэр хонтуруоллуур-сэрэтэр уматыы оҥоһуллуохтаах. Ол эбэтэр, ойуур пуондатын сиригэр хаппыт от, кур мутук о.д.а. дөбөҥнүк умайар матырыйааллар уматыллыахтаахтар. Ону ханна, хаһан тэрийэри лесничестволар быһаараллар.

«Якутлесресурс» судаарыстыбаннай тэрилтэ судаарыстыба сакааһын быһыытынан, федерацияттан көрүллүбүт үбүнэн быйыл 20 тыһ. гектар иэннээх сиргэ хонтуруоллуур-сэрэтэр уматыыны оҥоруоҕа.



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

одиннадцать + десять =

ЛЕНТА НОВОСТЕЙ