Сүөһү эбии аһылыгын бэлэмнээһиҥҥэ туох үлэ бара турар? (ВИДЕО)

Комментарии Экономика и сельское хозяйство

Просмотров: 13

NVK-ONLINE.RU – Тыа хаһаайыстыбатыгар улахан суолталаах оттооһун хампаанньата чугаһаата. Быйылгы былаан чопчуланан, улуустарынан үллэриллэн турар. Ол курдук өрөспүүбүлүк үрдүнэн 484 тыһыынча туонна от бэлэмнэниэхтээх, 11 тыһыынча туонна сенаж. Кэнники сылларга хаһаайыстыбалар сиилэстээһиҥҥэ улахан болҕомто уураллар. Ааспыт сылга өрөспүүбүлүкэ үрдүнэн 14 тыһыынча тонна сиилэс былааҥҥа турбут эбит буоллаҕына, быйылгы дьылга 19 тыһыынча тоннаҕа диэри улаатта.

От үрэхтээх Горнай улууһа кэккэ сылларга мөлтөх от үүнүүтүттэн туруоруллубут былааны толорбокко, атын улуустартан атыылаһыыта элбэхтэ бэлиэтэннэ. Күн бүгүн улууска сүөһү ахсаана 5569 тэҥнэстэ. Хороҕор муостааҕы кыстатарга быйыл 16 тыһыынча тонна от былааҥҥа турар.

Былырыын Нам улууһугар от эмиэ мөлтөхтүк үүммүтэ.

Ол курдук сүөһү эбии аһылыгын бэлэмнээһиҥҥэ бу сайын 130 мөлүйүөн солкуобайга үлэ барыа. Тыа хаһаайыстыбатын уонна ас-үөл Министиэристибэтэ көрбүт 70 мөлүйүөнүн таһынан улуустар уонна нэһилиэктэр бэйэлэрэ эбии 59 мөлүйүөн үп тыырдылар. Бу бырагыраама 4 хайысханан үлэлиэҕэ.

Сүөһү эбии аһылыган оҥоруу бырагырааматыгар 9 улуус хабылынна. Нам, Горнай уонна Мэҥэ Хаҥалас улуустарын баһылыктара биир бастакынан докумуоннарын толору хомуйан, тыа хаһаайыстыбатын уонна ас-үөл Министиэристибэтин кытта сөбүлэҥ түһэристилэр.

Ааспыт сайын кураан, ардаҕа суох тымныы сайын туран биэрбитэ. Үгүс улуус отун былаанын толорбокко, атын улуустартан аатыласпыта. Онон бу бырагыраама өссө сэбиэскэй былаас саҕаттан быраҕыллан турар бааһыналары чөлүгэр түһэрэн, сүөһүгэ, сылгыга эбии ас таһаарар сүрүн соруктаах.

Тыа хаһаайыстыбатын уонна ас-үөл Министиэристибэтин анал бырагыраамата үс сылга үлэлиэҕэ. Кэлэр сылга үбүлээһин 120 мөлүйүөҥҥэ диэри улаатыаҕа.



Добавить комментарий

Ваш e-mail не будет опубликован. Обязательные поля помечены *

два × пять =