«Саха» НКИХ «Саҥа күн» биэриитэ 15 сылын туолла

Комментарии Главные новости, От редакции

Поделиться:

НВК САХА – “Саха” НКИХ “Саҥа күн” биэриитэ көрөөччү дьүүлүгэр тахсыбыта номнуо 15 сыл буолла. Бу сыллар устата биэрии дьон биһирэбилин ылан, салгыы сайдар, күнтэн күн саҥа, интэриэһинэй сонуннары, рубрикалары бэлэмниир.

“Саҥа күн” биэрии сахалыы уонна нууччалыы тылынан аан бастакытын 2004 сыл олунньу 9 күнүгэр тахсыбыта. Ол кэмтэн биэрии күн аайы сарсыарда 7 чаастан үлэтин саҕалыыр. Билигин икки чаас быһа эфиргэ көрөөччүлэргэ анаан араас сонуннары, интэриэһинэй ыалдьыттары билиһиннэрэр.

Төһө даҕаны тэлэбиисэр нөҥүө нус-хас туттан олордоллор, лоп курдук биэриини ыытталлар, төһөлөөх үлэ ыытылларын үлэһиттэр бэйэлэрэ билэн эрдэхтэрэ.

Биэрии дьиҥ үлэтин сэгэтэн көрдөххө, бу курдук. “Саҥа күн” биэрии үлэһиттэрин сарсыарда 4 чаастан хомуйан саҕалыыллар. Маны үлэлэригэр дьиҥнээхтии бэриниилээх, айар-тутар дьон тулуйар. Ол да иһин “Саҥа күнү” көрөөччү салгыбакка көрөр, сарсыардааҥҥы доҕор-атас оҥостор буоллаҕа.

Сарсыарда аайы сахалыы сайаҕас тылынан көрөөччүлэрин уруйдуу, Алена Антонова уонна Михаил СергеевЕвгения Арьянова уонна Петр Кулаковскай, Пелагея Буртахова уонна Алексей Лукин көрсөллөр. Нууччалыы тылынан Ларина Сукуева уонна Иван Луцкан, Катерина Винокурова уонна Дмитрий Никифоров ыыталлар.

  • Саҥа күн

 

 

“Саҥа күн” биэрии салайааччыта Алена Антонова эфиргэ тахсары барытын мүнүүтэтигэр тиийэ аттаран оҥорор. Биэрии бүтүн Саха сирин иннигэр кырдьыктаах, оруннаах уонна интэриэһинэй буоларын туһугар кыһаллар, дьаныһан туран үлэлиир дьонтон биирдэстэрэ буолар.

“Хас биирдии биэрии – биир улахан кэллэктиип уопсай үлэтин түмүгэ. Маныаха саамай улахан үлэни көрсөр режиссердэрбит Иван Игнатьев, Айталина Тарабукина, биэриини таһаарааччы режиссердэрбит Сардана Протодьяконова, Мария Сунхалырова уонна үлэни барытын сибээстээччи администратор Сардаана Омукова буолаллар. Кэллиэгэлэрбитигэр өссө да үрдүк ситиһиилэри, таһаарыылаах үлэни баҕарабын!” , – диэтэ Алена Антонова.

Билигин хас биирдии кэрэспэдьиэн оҥорор сюжеттарын таһынан рубрикалаах.  Ол курдук сахалыы Марианна Потапова “Үлэ киһитэ”, “Бэйэ дьыалатын тэринии”, Карина Семенова “Тускул”, “Ааҕар кинигэм”, экология тиэмэтигэр Анна Васильева, дьиэ кэргэн, олох-дьаһах, социальнай ыйытыыларга, сытыы тиэмэлэргэ Екатерина Эверстова үлэлэһэллэр. Оттон нуучча тылынан “Пульс экономики” Наталья Колесова, Катерина Винокурова  “Электронные услуги”, “Мои документы” ыыталлар.

 

“Саҥа күн”/”Новый день” биэрии бастакы ыытааччылара 

2006 сылтан 10 тахса сыл устата биэриини Татьяна Бурцева салайбыта. Кини  билигин “Саха” НКИХ уопсастыбаннай-бэлитиичэскэй эрэдээксийэтин салайааччыта. Кини оҥорбүт үтүөтүн, үлэһиттэри иитэн-үөрэтэн таһаарбытын билиҥҥэ диэри үчүгэйдик саныыллар.

“Саҥа күн”/ “Новый день” бастакы ыытааччылара билигин хампаанньа тутаах үлэһиттэрэ: ол курдук билигин “Саха” НКИХ рекламнай салаатын, “Город женщин”, “Кэрэ кистэлэ” биэриилэр салайааччылара, продюсер Анна Кириллина; “Талбан” биэрии ыытааччыта Олег Колесов “Саха” НКИХ Нерюнгритааҕы филиалын салайааччыта, эрэдээктэрэ Тамара Игнатьева;  “Айуу, чэ” тэттик киинэлэри устарга эрэдээктэр Сардаана Плотникова уо.д.а.

 

 

“Саҥа күн”/”Новый день” – интэриниэт ситимигэр 

Аныгы олох ирдэбилинэн биэрии интэриниэт ситимин туһанар. Ол курдук  “Утро НВК” диэнинэн Инстаграм ситимигэр булуохха сөп. Манна күн ахсын тахсар тиэмэлэрин, тугу кэпсэппиттэрин, ким ыалдьыттаабытын суруйаллар. Ону таһынан көрөөччүлэр ыйытыыларын 8 914 279 22 62 нүөмэргэ  биэриэхтэрин сөп.

“Саҥа күн” биэрии инникитин былаана элбэх, дьон-сэргэ салгыбакка үлэлиирин туһугар үлэлиир-хамсыыр, саҥа сайдар суоллары тобулар.

 

 

“Саҥа күн”/ “Новый день” архыыбыттан көрүҥ:

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

2 × 2 =

ЛЕНТА НОВОСТЕЙ