Саха сиригэр өссө биир бастыҥ үөрэх кыһата аһыллара күүтүллэр

Комментарии От редакции

Поделиться:

НВК САХА – 2020 сыл балаҕан ыйын 1 күнүгэр Саха сиригэр өссө биир бастыҥ үөрэх кыһата аһыллара торумнанар. Ол курдук аан дойдутааҕы Арктика оскуолата аана тэлэччи аһыллыахтаах. Билигин саҥа үөрэх кыһатын тутуу “Сосновай бор” оҕону чэбдигирдэр киин сиригэр тэтимнээхтик барар.

Наташа Посельская бүгүн аҕатыныын “Сосновай бор” чэбдигирдэр киин тэлгэһитигэр үктэммиттэрэ ылбычча буолбатах. Эһиил баччаларга манна Аан дойдутааҕы Арктика оскуолата аһыллан, алтан чуораан чугдаарыаҕа. Онно киирээри, Наташа бу саас бастакы тургутууну ситиһиилээхтик ааспыт. Мантан салгыы Наташа сүүмэрдээһин иккис түһүмэҕэр, аны тылынан эксээмэн туттараары, элбэҕи ааҕар, үөрэтэр.

“Үс предмеккэ тургутук ааспыта: нуучча тылыгар, математикаҕа, английскай тылыгар”, – диэтэ Наташа.

“Оҕобут бэйэтэ бэлэмнэнэр, туораттан көмө суох. Аан дойдутааҕы таһымнаах оскуолаҕа атын омук оҕолорун кытта алтыһарга, уопсай култуураҕа үөрэтэллэрэ наһаа үчүгэй, туһалаах буолуо дии саныыбын”, – диэн Наташа аҕата Семен Посельскай этэр.

Кырдьыга да, Арктика оскуолата оҕо аймахха киэҥ суолу тэлиэхтээх. Тоҕо диэтэххэ, ыччаты уһуйуу аан дойдутааҕы бакалавриат бырагырааматыгар олоҕуруо. Онон английскай тылынан үөрэтии инники күөҥҥэ тахсыаҕа.

“Оҕолор сатабыллара, билиилэрэ-көрүүлэрэ кэҥээн, аан дойду таһымыгар үөрэнэр, үлэлиир кыахтаах дьон буолан тахсыахтаахтар”, – диэн үөрэх миниистирин солбуйааччы Ирина Любимова бэлиэтээтэ.

Оттон билигин саҥа үөрэх кыһатын силигин ситэрээри, кэлии-барыы, киирии-тахсыы эргийэн олорор. Тутуу учаастагар билигин 90 киһи сылдьар. Ким аныгы матырыйаалынан эпсиэйдиир, ититэр ситимин тардар, ол быыһыгар биир биригээдэ толору хааччыллыытын киллэрээри туруммут.

Тутуу судаарыстыба уонна чааһынай биисинэс кыттыгас дуогабардарынан барар. Бу күҥҥэ сорук 70 бырыһыана бүтэн-оһон, ахсынньыга түмүктэниэхтээх, тардыллыы, бытаарыы билиҥҥитэ көстүбэт.

Аан дойду ирдэбилигэр дьүөрэлэһэр оскуола ис-тас оҥоһуута чыҥха атын буолуоҕа. Үс этээс былаһын тухары кэбиниэттэр, эт-хаан өттүнэн сайдарга бассейн, успуорт саалата, өссө планетарий, ол хаачыстыбата кытаанахтык хонтуруолланар.

Онон үүнэр сылга өссө биир бастыҥ оскуола үлэҕэ киирэн, өрөспүүбүлүкэ ыччата үүнэригэр-сайдарыгар улахан хардыы буолуоҕа.

 

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

15 − 8 =

ЛЕНТА НОВОСТЕЙ