Саха сиригэр суос-соҕотох көрбөттөр библиотекалара ааҕааччыга чөл өйү-санааны иҥэрэргэ тиһиктээх үлэни ыытар

Комментарии От редакции

Поделиться:

НВК САХА – Өрөспүүбүлүкэ үрдүнэн уопсайа 500-тэн тахса библиотека баар буоллаҕына, көрбөт дьоҥҥо анаммыт библиотека суос-соҕотох. Күн бүгүн тустаах библиотекаҕа Брайль систиэмэтинэн бэчээттэммит 130 тыһыынчаттан тахса анал кинигэ хараллан сытар.

Бу курдук оҕо эрдэҕиттэн мөлтөхтүк көрөр Григорий Дмитриев библиотекаҕа куруутун сылдьар. Бу сырыыга кэтэспит кинигэтэ кэлэн биэрэн, ааҕааччыны үөртэ.

“Нууччалыы кинигэлэри урут истэр этим, билигин тоҕо эрэ нууччалыы кинигэлэртэн аа-дьуо сыыйа-баайа тэйэн, үксэ барыта сахалыы кинигэлэри истэбин”, – диир Григорий.

Оттон маннык анал библиотекаҕа сахалыы туһааннаах литератураны көрдүүр уустук буолуон сөп этэ. Ол гынан баран үлэһиттэр Брайль систематын, анал шрибинэн бэчээттиир техниканы толору баһылаан, ааҕааччы баҕатын толороллор. Сылга ортотунан 20-чэ кинигэни бэчээттииллэр.

“Үксэ ааҕааччыларбыт интэриэстэрин болҕомтоҕо уурабыт. Холобур, кинилэр ордук саха литературатын, Саха сирин историятын, аныгы литератураны интэриэһиргииллэр”, – диэтэ библиотека тифлоинформационнай салаатын үлэһитэ Евгения Потапова.

Библиотека литературанан эрэ муҥурдаммат. Ааҕааччы олох кэрэтин, ньулуунун барытын эт хаанынан билэрин туһугар араас бырайыактары толкуйдуур.

Библиотека өссө биир бырайыагынан көрбөт дьоҥҥо анаан сахалыы киинэлэр саҥата суох сыаналарын кылгастык, ол гынан баран сиһилии кэпсээн биэрэллэр. Салгыы маннык киинэ ахсаанын элбэтэр сорук турар.

Библиотека куоратынан эрэ муҥурдаммакка, улууска баар библиотекалары кытта ыкса үлэлэһэр. Наадалаах матырыйаалынан хааччыйар.

“Биһиги улуустарга олорор ааҕааччыларбытын кинигэнэн хааччыйабыт. Кинилэри кытта тэҥҥэ үлэлэһэбит, билиҥҥи туругунан 29 улууһу кытта дуогабардаһан олоробут”, – диэтэ өрөспүүбүлүкэтээҕи көрбөттөр библиотекаларын дириэктэрэ Айталина Никитина.

Онон 17 үлэһиттээх биир дьоҕус тэрилтэ күн бүгүн сүҥкэн суолталаах соругу үтүө суобастаахтык толорон кэллэ. Салгыы да доруобуйаларынан хааччахтаах дьоҥҥо сырдыгы, чөл өйү-санааны иҥэрэргэ тиһиктээх үлэни былаанныыр.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

1 × два =

ЛЕНТА НОВОСТЕЙ