Саха сирин оҕолорун хорсун быһыылара бүтүн Арассыыйаҕа биллэр

Комментарии Общество и политика

Поделиться:

НВК САХА – Кулун тутар 1 күнүгэр Поклоннай хайаҕа Кыайыы түмэлин саалатыгар бүтүн Арассыыйатааҕы “Горячее сердце” диэн уопсастыбаннай хамсааһын лауреаттарын чиэстээһин ыытыллар. Онно 28 лауреат ыҥырылынна. Бу туһунан оҕо хамсааһынын сайыннарар өрөспүүбүлүкэтээҕи киин пресс-киинэ иһитиннэрэр.

 

Бу сылга Саха сириттэн үс оҕону наҕараадалыахтара: Максим Кудрин өлбүтүн кэннэ наҕараадаланна, кини 2007 сыллаахха Хаҥалас улууһун Булгунньахтаах нэһилиэгэр төрөөбүт, 2018 сыллаахха сырдык тыына быстыбыт. Киниттэн ураты 2005 сыллаахха Таатта улууһун Ытык Күөлүгэр төрөөбүт Андрей Слепцов уонна 2005 сыллаахха Бүлүү улууһун Тоһу нэһилиэгэр төрөөбүт Василий Терентьев наҕараадаланыахтара.

2018 сыл ыам ыйын 24 күнүгэр Булгунньахтаахха ыар түбэлтэ буолбута. Ол күн биэс киһи ытыллан өлбүтэ, 4-с кылаас үөрэнээччитэ Максим Кудрин, кини ийэтэ уонна аттынааҕы дьиэлэргэ олорор үс киһи. Кырачаан Максим ийэтин быыһаары, саалаах киһи илиитигэр киирэн биэрэн, сырдык тыына быстыбыта. Ол эрээри хорсун уолчаан аата умнуллубат.

Оттон Тааттатааҕы лицей 7-с кылааһын үөрэнээччитэ Андрей Слепцов баара-суоҕа 13 сааһыгар иккитэ ууга түһэн эрэр дьону быыһаан турардаах. Аан бастаан 2017 сыллаахха Андрей доҕотторун кытта бүтүн дьиэ кэргэни өлөр өлүүттэн быыһаабыттара. Ол күн Лидия Макарова сиэттэрин кытта Таатта өрүскэ сөтүөлүү киирбит. Үс киһини күүстээх сүүрүк илдьэн истэҕинэ, Андрей доҕотторун кытта быыһаабыттар. Иккиһин Андрей Слепцов 2018 сыл от ыйыгар бэһис кылаас үөрэнээччитин быыһаабыт. 50 миэтэрэни харбаан, тимирэн эрэр оҕону ууттан таһаарбыт.

2018 сыл от ыйын 2 күнүгэр Тоһуга иэдээн буолбута. Онно түөрт кыыс Бүлүү өрүһүгэр тимирэн эрдэхтэринэ, олохтоох Василий Терентьев быыһаары, бэйэтэ былдьаммыт. Кини уола Василий төһө кыайарынан көмөлөспүт. Чугастааҕы тыаттан уһун маһы булан, оҕолорго уунан таһаартаабыт. Ол кэмҥэ бэйэтэ тимирэ сыһа-сыһа кыргыттары быыһаабыт. Быыһаммыт оҕолор өйдөрүгэр Василий Андреевич Терентьев букатыннаахтык хааллаҕа, ону кытта уола Вася эмиэ хорсун быһыы холобура буолар.

 

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

три × 5 =

ЛЕНТА НОВОСТЕЙ