Сунтаар Күндэйэтигэр Максим Аммосов үбүлүөйүгэр хапсаҕайга аһаҕас турнир ыытылынна (ВИДЕО)

Комментарии Спорт и культура

Просмотров: 20

NVK-ONLINE.RU – Сунтаар улууһун кыра Күндэйэ бөһүөлэгиттэн Россия чемпионнара Алквиад Ивановтан, Петр Поповтан саҕалаан Сойуус, Россия элбэх чемпионнара үүнэн-сайдан таҕыстылар. Кинилэртэн биирдэстэрэ Максим Аммосов үбүлүөйдээх көбүөрэ Ньурба, Мирнэй, Бүлүү, Үөһээ Бүлүү уонна Сунтаар хапсаҕайдьыттарын түмтэ.

Дэгиттэр тустуук Максим Аммосов күннээн-күөнэхтээн сылдьар кэмигэр улахан көбүөрдэргэ эҥинэ бэйэлээхтэри үөһэнэн күдээритэр быраҕыыларынан салыннартыыра. Кини эдэрдэргэ Сэбиэскэй Сойуус, Россия, Уһук Илин чемпиона буола сылдьыбыта.

Биир дойдулаахтара уолларын «Чаҕылхай Максим» диэн киэн тутта ааттыыллар. Биир күлүм түгэн, ыарахан операция барытын сарбыйан, билигин инбэлиит буолан олорор. Доҕотторо, тустууну таптааччылар кини 55 сааһын бэлиэтээн, саамай күндү бэлэҕи – тустуу уонна тустуук бырааһынньыгын тэрийдилэр. Турниры биир дойдулааҕа, спортивнай комментатор Александр Васильев – Көрдүгэн этэн-тыынан көҕүлээтэ.

Максим Аммосов хапсаҕайга аһаҕас турнирын кыайыылаахтарынан 70 киилэҕэ диэри Бордоҥ күтүөтэ Сандал Горохов, ыарахан ыйааһыҥҥа – Ньурба бөҕөһө Рустам Иннокентьев буолан, сыаналаах бириистэринэн наҕараадаланнылар.



Добавить комментарий

Ваш e-mail не будет опубликован. Обязательные поля помечены *

4 × 1 =