Таатта Харбалааҕын кырачааннара уустук инструменнарга оонньууллар

Комментарии От редакции

Поделиться:

НВК САХА – Харбалаахтааҕы “Кэскил” оҕо уһуйааныгар кырачааннары ырыа кэрэ эйгэтигэр уһуйалларын тэҥэ, музыкальнай инструмены толору баһылыылларыгар эмиэ үөрэтэллэр.

Виктор Туманов салайар бөлөҕүн уолаттара баян, синтезатор, гармоника курдук уустук инструменнарга оонньууллар.

Алта саастаах Леня уол баянын илиитигэр ылаат, биир-биир ноталары билиһиннэрэр. Салгыы сөбүлүүр ырыатын талан, бэйэтигэр сөп эрээри, ботуччу ыйааһыннаах баяныгар имигэс тарбахчааннарынан оонньоон, сыыйа-баайа ырыа ис хоһоонугар, тэтимигэр уйдаран, бүтүн айымньыны толорбутунан барар.

“Леня бэйэтэ оонньуур уонна ыллыыр. Бу олус уустук ээ”, – диир Виктор Туманов. 

Оттон кырачаан ырыаһыт Диана Бурмистрова баара-суоҕа үс саастаах. Быйылгыттан уһуйааҥҥа саҥа кэлбит диэтэххэ, номнуо эн-мин дэсиһэн ырааппыт, уһуйаанын кэнсиэригэр, нэһилиэгин дьонугар баян доҕуһуолунан ырыа бэлэхтиир киһи буолбут.

Салайааччы Виктор Туманов – ырыа эйгэтигэр аата-суола биллэр киһи. Быйылгы Байанай сыла бэртээхэй ситиһиилэртэн саҕаланна диир. Төрөөбүт дойдутугар Үөһээ Бүлүүгэ Николай Бойлохов аатынан баянистар күрэхтэрин Кылаан бирииһин, Чөркөөххө Николай Тулааһынап 60 сылыгар ыытыллыбыт күрэххэ лауреат үрдүк аатын ылбыта.

“Талааннаах оҕолор кыахтарын көрөн, репертуардарын уустугурдан биэрэбин. Холобур, үс саастаах Диана “Смуглянка” диэн ырыаны ыллыыр. Бу эмиэ оҕо кыаҕын көрөн ыллатыы буолар”, – диэтэ Виктор.

Бу курдук кырачааннар музыка эйгэтигэр бастакы хардыыларыттан саҕыллан, ырыа куттаах “Кэскил” кэскилэ кэҥиир, аата-суола сураҕырар.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

восемнадцать − 1 =

ЛЕНТА НОВОСТЕЙ