«Утумнааһын» куруһуок оҕолоро Кыайыы күнүнэн кылаас чааһын тэрийдилэр

Комментарии Образование и здравоохранение

Поделиться:

НВК САХА – Дьокуускай куорат 17-с №-дээх оскуолатыгар оҕолору историяны ытыктыыр, төрүттэрин билэр, олоххо бэлэмнээх, киэҥ билиилээх буоларга уһуйар «Утумнааһын» диэн куруһуок алтыс сылын ситиһиилээхтик үлэлиир.

Бүгүн, ыам ыйын 8 күнүгэр, Улуу Кыайыы күнүн көрсө кылаас чааһа ыытылынна. 1941-1945 сс. сэрии уоттаах сылларыгар дьоруойдуу охтубут саллааттарга, тыылга үлэлээбит дьоҥҥо, сэрии кэмин оҕолоругар ытыктабыл бэлиэтэ — үүнэр көлүөнэ өйдөбүлэ. Оҕолор кылааһынан байыаннай хаамыынан парааттаан киирдилэр, Кыайыы ырыаларын ыллаатылар, хоһоон аахтылар. Кылаас чааһыгар үгэс быһыытынан ыалдьыттар кэллилэр. Ол курдук, 4В кылаас үөрэнээччитэ Софронова Лилиана төрөппүт эһэтэ, сэрии сылын оҕолоро Григорий Константинович Сафонов, Татьяна Васильевна Аммосова уонна 17-с оскуола урукку дириэктэрэ, эмиэ сэрии сылын оҕото, Лидия Николаевна Максимова.  Кинилэр сэрии ыар сылларын, бэйэлэрин олохторун туһунан кэпсээтилэр, оҕолорго баҕа санааларын тиэртилэр.

Куруһуогу бүтэрбит Ира Афанасьева эһэтэ, сэрии кыттыылааҕа, Кыһыл сулус уордьанын кавалера, Доҕордоһуу уордьанын кавалера, Аҕа дойду улуу сэриитин I истиэпэннээх кавалера Гаврил Дмитриевич Ефимов туһунан кэпсээтэ.

«Оҕолорбут «Утумнааһын» куруһуокка сөбүлээн дьарыктаналлар. Бүгүҥҥү кылаас чааһа куруһуок түмүктүүр дьарыга буолар. Оҕолор куруһуокка бэйэлэрин төрүччүлэрин үөрэтэллэр, Саха сирин историятын чинчийэллэр, араас кэнпириэнсийэлэргэ кытталлар. Куруһуокка, холобур, биһиги кылааспытыттан 10 оҕо, атыттартан эмиэ уонтан тахсалыы оҕо сылдьар», — диэн кэпсиир 4В кылаас салайааччыта Любовь Заровняева.

«Утумнааһын» куруһуок салайааччыта, история учуутала Наталья Карпова тэрээһини иилээн-саҕалаан ыытта. «Оҕолор, Кыайыы бырааһынньыга улахан эрэйинэн-муҥунан кэлбитин билиэхтээххит. Мин тыа сирин оскуолатыгар үлэлиир эрдэхпинэ, бэтэрээн элбэх этэ. Оччолорго Кыайыы күнүн соччо бэлиэтээбэт этилэр. Ийэ дойдубут көмүскүүр ытык иэспитин толорбут, булгуччу кыайыахтаахпыт диэн өйдөбүллээхтэрэ. Санаан көрүҥ, саха дьоно алаастартан сэриигэ барбыттара. Ол дьоҥҥо өссө охсуулаах буолбута. Сорохтор илиилэригэр сааны даҕаны тутан көрбөтөхтөрө, нууччалыы да билбэттэрэ. Сахабыт сириттэн хас биирдии сэриилэспит киһи, тыылга үлэлээбит дьон, оҕолор — бары дьоруойдар. Сэрии оҕолоро оҕо саас, үөрүү-көтүү диэни билбэккэ улааппыттара, тэбис-тэҥҥэ улахан дьону кытта үлэлээн. Кыайыы туһугар турууласпыттара. Биһиги ону өйдүү сылдьыахтаахпыт уонна кэлэр көлүөнэҕэ тиэрдэн иһэр ытык иэстээхпит», — диэн бэлиэтээтэ.

Тэрээһин «Өйдүүбүт, киэн туттабыт, махтанабыт» диэн суолдьут санаалаах ааста.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

19 − 1 =

ЛЕНТА НОВОСТЕЙ