Уус Алдаҥҥа уонна Намҥа халаан уутугар бэлэмнэнэллэр

Комментарии Общество и политика

Поделиться:

НВК САХА – Уус Алдан уонна Нам оройуоннарыгар халаан уутугар бэлэмнэнэллэр. Ыам ыйын 16 күнүгэр СӨ бырабыыталыстыбатын бэрэссэдээтэлэ Евгений Чекин оройуоннар сирдэрин-уоттарын бөртөлүөтүнэн кэрийэн көрүүтүгэр ыксаллаах быһыыны-майгыны сэрэтэр үлэни билистэ. Бу туһунан Ил Дархан уонна бырабыыталыстыба пресс-сулууспата иһитиннэрэр.

Уус Алдан баһылыга Алексей Федотов Евгений Чекиҥҥэ иһитиннэриитигэр ууга барар кутталлаах нэһилиэнньэлээх пууннарга бары туһааннаах миэрэлэри ылбыттар. Быстах кэмҥэ олорор пууннар тэриллибиттэр, аһынан-үөлүнэн, уунан, эминэн-томунан, уматыгынан толору хааччыллыбыттар. Чэриктэй сэлиэнньэтин олохтоохторун көһөрбүттэр, Оҕуруоттаах сэлиэнньэтин олохтоохторо көһөргө бэлэмнэр.

Бырабыыталыстыба бэрэссэдээтэлэ бэлэм олоруҥ уонна нэһилиэнньэни куттал үөскүүр түгэнигэр суһаллык иһитиннэриҥ диэн ыҥырда.

“Быһыы-майгы эмискэ уларыйыан сөбүн Харбалаах холобуругар көрөбүт. Ааспыкка онно көтөн тиийэрбитигэр барыта этэҥҥэ курдук этэ. Аҕыйах күн иһигэр олбуордары барытын уу ылла. Онон ханнык баҕар балаһыанньаҕа бэлэм буолуохха наада”, – диэн эттэ.

Ымыйахтаах сэлиэнньэтигэр Евгений Чекин Нам улууһун баһылыгын эбээһинэһин толорооччу Ефим Гоголевы көрүстэ. 12 нэһилиэнньэлээх пууҥҥа 7914 киһи олорор 1808 дьиэтэ ууга барар кутталлаах. Билиҥҥи туругунан, оройуоҥҥа ууга барбыт тэлгэһэ, дьиэ суох, ыксаллаах быһыыны-майгыны сэрэтэр миэрэлэри ыллылар. Үөдэй, Партизан уонна Арбын сэлиэнньэлэрин олохтоохторун көһөрөн бүтэрэн эрэллэр. 2 522 киһи анаммыт быстах кэмҥэ олорор пууннары бэлэмнээтилэр. Ымыйахтаахха уонна Граф биэрэгэр быһыттары бөҕөргөтөллөр.

Маны таһынан Евгений Чекин Сыгыннаах сэлиэнньэтигэр бэлэмнэнии үлэтин билистэ.

Евгений Чекини кытта Ил Түмэн бэрэссэдээтэлэ Александр Жирков, бырабыыталыстыба бэрэссэдээтэлин маҥнайгы солбуйааччы Алексей Колодезников, Дьокуускай куорат баһылыга Айсен Николаев, СӨ айылҕа харыстабылын миниистирэ Сахамин Афанасьев, СӨ тыа хаһаайыстыбатыгар уонна ас-үөл бэлиитикэтин миниистирин солбуйааччы Афанасий Семенов, дойду ыксаллаах быһыыга-майгыга Саха сиринээҕи салайааччыта Павел Гарин сылдьыстылар. -яв//кс

Источник: сайт телеканала «Якутия 24».

 

 

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

четыре × три =

ЛЕНТА НОВОСТЕЙ