Уус дьон дьон күрэхтэрэ Үөһээ Бүлүүгэ ыытылынна

Комментарии Общество и политика

Поделиться:

НВК САХА – Үөһээ Бүлүү оройуонун Кэнтик нэһилиэгэр аҕа уонна уол оҕо күнүгэр анаан «Үөһээ Бүлүү ураты талааннаах уустара» оройуоннааҕы күрэх иккис төгүлүн үрдүк таһымҥа ыытылынна.

Айар куттаах уус дьон дьарыгын киэҥ эйгэҕэ билиһиннэрэр, саҥа ааттары арыйар сыаллаах ыытыллыбыт күрэххэ тимир, мас уонна муос уустара кэлэн, бэйэлэрин оҥоһуктарын дьон-сэргэ иннигэр таһаардылар. Быыстапкаҕа ордук саха быһаҕа эр дьон болҕомтотун тарта.

Эр дьон биир сүрүн туттар тэрилэ быһах аҥардас тас көстүүтүнэн буолбакка, бөҕө-таҕа буолара, сытыыта сыаналанар. Ону тургутан көрөр түһүмэх быһаарда.

Быһаҕы тургутан көрөргө улахан дьону сэргэ уолаттар эмиэ кытыннылар. Кэнтик оскуолатын 8 кылааһын үөрэнээччитэ Коля Константинов кыра сааһыттан аҕатын батыһа сылдьан үөрэнэн, быйыл бэйэтэ оҥорбут быһаҕынан бастаата.

Салгыы кыттааччылар аны Харыйалаах эбэҕэ киирэн, абыраллаах атастарын анньыыны мууска тургутан көрдүлэр.

“Анньыы түргэнник уонна хотуулаахтык мууһу дьөлө киирдин диэн бу синньигэс түөрт кырыылаан оҥоһулунна”, – диэн Кэнтик нэһилиэгин “Уус саха” түмсүүтүн бэрэссэдээтэлэ Анатолий Таркаев этэр.

Күрэхтэһии үһүс түһүмэҕэ “коммерческай” диэн ааттанна. Манна кыттааччы хайаатар да, бэйэтэ оҥорбут буолбакка, атыыласпыт эбэтэр бэлэх туппут быһаҕын кыаҕын тургутан көрдө. Онон биир күн иһигэр уһанар дьоҕурдаах дьон бииргэ түмсэн, норуот үтүө үгэстэрин, илиинэн уус-уран оҥоһукка дьарыгын сөргүтэргэ, үйэтитэргэ уонна эдэр ыччаты көҕүлүүргэ сүҥкэн кылааты киллэрдилэр.  -ай//кс

 

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

пять × 4 =

ЛЕНТА НОВОСТЕЙ