Владимир Солодов: Өймөкөөн улууһа сайдар кэскиллээх

Комментарии Главные новости, Общество и политика

Поделиться:

НВК САХА – Өймөкөөн улууһугар ситэриилээх былаас отчуота түмүктэннэ. СӨ бырабыыталыстыбатын бэрэссэдээтэлэ Владимир Солодов салайааччылаах үлэлиир бөлөх Томторго, Өймөкөөҥҥө уонна Уус Ньараҕа сырытта. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

Премьер-миниистир эппитинэн, улуус боппуруостарын быһаарарга урбаан сайдыыта көмөлөһүө.

“Өймөкөөҥҥө отчуоттуу бэйэм кэлэ сылдьарым суолталаах этэ. Тоҕо диэтэххэ, бу улууска туризм сайдар тосхоллоох. Ол гынан баран, быһаарыллыбат дии саныыр боппуруостара элбэх”, – диэтэ Солодов. 

Өймөкөөн улууһун олохтоохторун тыын боппуруостарынан олох-дьаһах хомунаалынай хаһаайыстыба туруга, чуолаан уунан хааччыллыы буолар. Ол курдук, “Теплоэнергосервис” АУо дириэктэрэ Илья Горбунов этэринэн, тэрилтэ үлэһиттэрэ тустаах үлэни куруук ыыталлар уонна инвестиция бырагырааматын иитинэн 2018-2022 сылларга Аартык бөһүөлэгэр саҥа хочуолунай тутуута былааннанар.

“Экология” национальнай бырайыак чэрчитинэн ыраас уу кыһалҕатын хайдах быһаарары тобулуохпут”, – диэн Владимир Солодов эттэ.

Өссө биир сүрүн кыһалҕанан улууска тырааныспар боппуруоһа буолар. Ол курдук “Халыма” суолу өрөмүөннүүр наадатын уонна авиабилиэт сыаната үрдүк диэн эттилэр.

“Көтүү сыаната чэпчиирин, суоллар нуормаҕа эппиэттиир буолалларын туһугар үлэ ыытыахпыт. Бу сылга Уус Ньараҕа уулуссалары асфалынан бүрүйэн саҕалыахпыт. Улуус 100 сылыгар, ол эбэтэр 2020 сылга, үгүс боппуруостары, чуолаан Култуура дьиэтин өрөмүөнүн быһаарыахпыт”, – диэн бырабыыталыстыба бэрэссэдээтэлэ бэлиэтээтэ.

Үгэс быһыытынан, Өймөкөөҥҥө туризм сайдыытын туһунан кэпсэттилэр.

“Улуус сайдыытыгар уонна туруоруллубут соруктары ситиһэргэ урбааны өйүөххэ наада. Бу эйгэҕэ төһөнөн элбэх киһи ылыстаҕына, баар кыһалҕалары түргэнник быһаарыахпыт уонна туризм эйгэтин сайыннарыахпыт”, – диэн Солодов эттэ.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

20 + семнадцать =

ЛЕНТА НОВОСТЕЙ