НВК Саха

НВК САХА — Владивостокка Илиҥҥи экэнэмиичэскэй форум чэрчитинэн дзюдоҕа норуоттар икки ардыларынааҕы хамаанданан юношескай турнирга саха кыыһа Аина Моисеева түөртэ киирсэн, түөртэ кыайбыт. Наҕарааданы дойду бэрэсидьиэнэ Владимир Путин туттарбыт.

«Бу күрэхтэһии Владимир Путин уонна Япония Сидзе Абе тус бэйэлэрин өйөбүллэринэн ааспыт буолан таһыма, суолтата өссө хас эмит төгүл үрдээн эппиэтинэһэ эмиэ биир оччо үрдүк. Көрөргүт курдук, сыалын-соругун чиэстээхтик толордо! Түөртэ киирдэ, түөрт очукуону аҕалла. Дьэ, дьоһун кыайыы, улахан киһилии быһыы-майгы.
Оҕобутугар, тренердэригэр, төрөппүттэригэр, чугас дьонугар истиҥ эҕэрдэ уонна махтал», — диэн Аина Моисеева биир дойдулаахтара хатастар социальнай ситимҥэ кэпсииллэр.

Санатан эттэххэ, Илиҥҥи экэнэмиичэскэй форум бэһис төгүлүн Владивостокка балаҕан ыйын 4-6 күннэригэр буолла. Форумҥа өрөспүүбүлүкэ «Саха сиригэр оҥоһуллубут» быыстапканы тэниттэ. Манна Ил Дархан Айсен Николаев, өрөспүүбүлүкэ салалтата кытынна.

 Подробнее

НВК САХА — Константин Тимофеев режиссердаах айар бөлөх бу күннэргэ «Биэс ынахтаах Бэйбэрикээн эмээхсин» остуоруйа иккис чааһын уһулан бүтэрдэ. Фэнтези жанрдаах киинэни Саха сирин кэрэ айылҕалаах сирдэригэр устубуттар. Оҕолорго анаммыт киинэ иккис чааһа биэс сахалыы остуоруйа ис хоһоонугар олоҕуран оҥоһулунна.

Өрөспүүбүлүкэҕэ оҕо киинэтэ ахсааннаах. Хамаанда ол быһаҕаһы толорон, ситэрэн биэрэр санаалаах.

«Дьиҥэ, оҕоҕо төрүт култуураны, үгэһи уонна норуот тылынан уус-уран айымньытын киинэ нөҥүө сыһыарыахха сөп. Хас даҕаны улууска устубуппут. Олохтоохтортон баҕалаах дьон эмиэ кэлэн уһуллубуттара», — диир режиссер Константин Тимофеев.

Олоҥхо тыйаатырын артыыһа Дмитрий Хоютанов аты миинэрин ордук ыарырҕаппыт. «Түөрт күнү быһа ат үрдүгэр олорбуппут. Миэхэ ол биир өттүнэн уустук этэ, ол эрээри интэриэһинэй», — диир кини.

«Бэйбэрикээн эмээхсин» иккис чааһа, былаан быһыытынан, аны саас киинэ тыйаатырдарыгар көстүөҕэ.

Санатан эттэххэ, киинэ бастакы чааһа бу саас тахсыбыта.

 Подробнее

НВК САХА — Бүгүн, балаҕан ыйын 4 күнүгэр көҥүл тустууга «Боотурдар оонньуулара» оҕолор күрэхтэһиилэрэ саҕаланна. Манна Саха сирин бары муннуктарыттан уонна ыаллыы сытар Сахалин уобалаһыттан, Хабаровскай кыраайтан уонна Еврей автономнай уокуругуттан 924 эдэр спортсмен кэллэ.

Бастакы түмүктүүр киирсиилэри номнуо сарсын көрүөххэ сөп. Быһаарыылаах киирсиилэргэ 2008-2009 сыллааҕы төрүөх оҕолор тахсыахтара. Санатан эттэххэ, Боотурдар оонньуулара 20-с төгүлүн ыытыллар. 1999 сыллаахха бастакы бэрэсидьиэн Михаил Николаев көҕүлээһининэн ыытыллан саҕаламмыт.

«Биһиэхэ 924 кыттааччы кэллэ. Бары улуустан, атын регионнартан. Ыччакка саамай улахан күрэхтэһии буолар. Аатырбыт спортсменнарбыт оҕо сылдьан бары бу күрэхтэһииттэн тахсыбыттара», — диир күрэхтэһии кылаабынай судьуйата Василий Уйгуров.

 Подробнее