НВК Саха

НВК САХА — Үөрэх дьыла саҕаланан, оскуолаларга итии аһылыгы тэрийиигэ болҕомто күүһүрдэ.

Өрөспүүбүлүкэ  үөрэнээччитин 98 %-на уруогун быыһыгар аһыыр. Маныаха алын сүһүөх кылаас оҕолоругар уонна элбэх оҕолоох итиэннэ аҕыйах дохуоттаах ыал үөрэнээччилэрэ босхо аһыылларыгар компенсация көрүллэр. Ол курдук 1 -тан 4-с кылаастарга диэри күҥҥэ 8 солкуобай 64 харчы, онтон элбэх бииргэ төрөөбүттээх уонна үпкэ кыһарыйтарар дьонноох оҕолор 54 солкуобайга босхо аһыыллар. Чэпчэтиинэн 62 тыһыынча оҕо туһанар.

Маны таһынан күннээҕи аһылыкка олохтоох аһы-үөлү киллэриигэ итиэннэ үөрэнээччи хайдах төлөһөрүн, тугу аһаабытын төрөппүтэ көрө-билэ олорорун курдук тиһик оҥоһуллан, онно сыыйа Саха сирин кыһата барыта хабыллыахтаах.

«Биһиги lk14.ru диэн систиэмэҕэ киирэн, үһүс сылбытын туһана сылдьабыт. Оҕолор бары карточкалаахтар, онон төлөһөллөр. Төрөппүттэр сайтка регистрацияланан баран сайт нөҥүө менюну көрөллөр. Оҕолоро тугу сиирин, төһө харчыга аһаабытын барытын кэтээн көрүөхтэрин сөп. Дьокуускайга «Статус» диэн тэрилтэ итинник систиэмэни киллэрбитэ, онон үлэлии сылдьабыт», —  диэн национальнай гимназия дириэктэрэ Валентина Пермякова кэпсээтэ.

 Подробнее

НВК САХА — Россия үөрэхтээһиҥҥэ министиэристибэтин куонкуруһун Саха сириттэн уон учуутал кыайда. Бу туһунан өрөспүүбүлүкэ үөрэххэ министиэристибэтэ иһитиннэрэр.

Муниципальнай түһүмэххэ 99 учуутал кыттыбыт, өрөспүүбүлүкэ таһымыгар — 56, олортон уон бастыҥы талбыттар.

Кинилэргэ 200 тыһыынча солкуобайдаах бириэмийэ аныахтара.

Санатан эттэххэ, үөрэхтээһин министиэристибэтэ сыл аайы бастыҥ учууталлары талан бириэмийэлиир. Докумуоннары уопсастыбаннай экспертэр көрөллөр.

 Подробнее

НВК САХА — Саха сиригэр үлэ миэстэтин бүларга дьулуһар дьон аччаабыта 67%-на биир үрдүк үөрэхтээх. Бу туһунан «HeadHunter» хампаанньа Уһук Илиҥҥи уокуругун пресс-сулууспата иһитиннэрэр.

Портал өрөспүүбүлүкэҕэ бүтэһик сыл иһигэр тарҕатыллыбыт резюмелары ырыҥалаан көрүүтүн түмүгүнэн: үлэҕэ наадыйар дьон 7% үрдүк үөрэхтэрин ситэри бүтэрбэтэхтэр, 17% — орто анал үөрэхтээх, онтон 9% резюмеларыгар орто үөрэҕи бүтэрбиттэрин ыйбыттар.

«Үрдүк үөрэҕи бүтэрбит дьон үгүс өттө «Юрист» (97%), «Үрдүкү менеджмент» (95%) уонна «Наука уонна үрэҕирии» (92%) эйгэлэригэр киирсэллэр. Үрдүк үөрэҕин ситэри бүтэрбэтэх үлэ көрдөөччү дьон үксүн «Искусство, медиа» (18%), «Атыы-эргиэн» (15%) уонна «Маркетинг, реклама, PR» (14%) идэлээх  уобаластарга сыһыаннаахтар. Орто анал үөрэҕи бүтэрбитин үксүн «Үлэһит персонал» (57%), «Дьиэ-уот үлэһитэ» уонна «Спорт уонна кэрэ эйгэтин үлэһитэ» (50%)» үлэ миэстэлэрин буларга дьулуһар дьон ыйбыт», — диэн портал чинчийиитин түмүгэр этиллэр.

Саха сиригэр үлэ миэстэтин көрдүүн дьон иһигэр ыытыллыбыт ыйытык түмүгэ көрдөрбүтүнэн, биир үрдүк үөрэҕи бүтэрбит дьон 15% иккис үрдүк үөрэҕи ылыахтарын баҕаралларын, 41% — суоҕунааҕар баара ордук, 25% — баарынааҕар суоҕа ордук уонна 8%  — хаттаан устудьуон буолуон баҕарбатын ыйбыт.

 Подробнее

НВК САХА — Балаҕан ыйын 1 күнүгэр Ленскэй куорат 3-с №-дээх оскуолатыгар саҥа стадион үөрүүлээх арыллыыта буолла. Бу туһунан Ленскэй улууһун дьаһалтата иһитиннэрэр.

«Бу 5 сыллаах сыралаах үлэ түмүгэ: бастаан идеята үөскээһинэ, онтон үбүлэһиин боппуруостарын быһаарыы, бырайыак оҥоһуллуута, экспертизаны ааһыы уонна бүтэһик икки сыл — тутуу үлэтэ», — диэн оскуола дириэктэ Наталья Сидоркина кэпсиир.

Тутуу уопсай суумата 22 мөлүйүөн солкуобайга тэҥнэһэр. Стадионҥа оҥоһуу сабыылаах улахан футбол хонуута, анал сүүрэр суол, волейболу уонна баскетбол былаһааккалара, трибуналар, ыстаҥа дьаамалара бааллар. Манна балаҕан ыйын 2-с күнүттэр саҕалаан физкультуура уруоктара ыытыллан барыахтара.

Ленскэй дьаһалтата бэлиэтииринэн, билии күнүгэр улуус оскуолаларыгар уопсайа биэс тыһыынча үөрэннэээччи, олортон 500-тэн тахса маҥнайгы кылаас оҕолоро — үөрэхтэрин дьыла саҕаламмыт.

 Подробнее