2021 сылга диэри Уһук Илиҥҥэ 700-тэн тахса социальнай эбийиэги тутуохтара уонна өрөмүөннүөхтэрэ

2021 сылга диэри Уһук Илин 11 регионугар 700-тэн тахса социальнай эбийиэги тутуохтара, өрөмүөннүөхтэрэ уонна саҥатытан оҥоруохтара. Бу туһунан Уһук Илини уонна Арктиканы сайыннарыы министиэристибэтин пресс-сулууспата иһитиннэрдэ.

Миниистир Александр Козлов экономическай үүнүү кииннэрин социальнай сайыннарыы былааннарынан социальнай эбийиэктэри тутарга, өрөмүөннүүргэ уонна саҥатытан оҥорууга сыһыаннаах селекторынан мунньах ыытта («Биир кэлим субсидия»).

«Уһук Илини уонна Арктиканы сайыннарыы министиэристибэтин сүрүн соруга диэн субсидиянан эрэннэриллибит оскуолалар, балыыһалар, суоллар, суһал көмө массыыналара, успуорт былаһааккалара кэмигэр баар буолуохтаахтар. Дьон ону күүтэр», — диэн Козлов эттэ.

2019 сылга регионнар 39,1 миллиард солкуобайы ылбыттар. Сыл бүтүөр диэри 213 үлэ түмүктэниэхтээх. Бүгүҥҥү күҥҥэ 35 үлэ былаантан хаалан иһэр.

Былаантан хаалан иһэр регионнарга аныгыс нэдиэлэҕэ Уһук Илини уонна Арктиканы сайыннарыы министиэристибэтин хамыыһыйата тиийиэҕэ. Ол курдук бастакынан Забайкальскай уонна Хабаровскай кыраайдар тураллар, ол кэннэ Еврейскэй автономнай уобалас уонна Бурятия Өрөспүүбүлүкэтэ кэлэллэр.

2021 сылга диэри Уһук Илин 11 регионугар 700-тэн тахса социальнай эбийиэги тутуохтара, өрөмүөннүөхтэрэ. Маныаха федеральнай хааһынаттан 95,7 миллиард солкуобай тыырыллыбыт.

Ол курдук 19 балыыһа, 51 биэлсэр-акушер пууна, 27 успуорт уонна 20 култуура дьиэлэрэ тутуллуохтара. 262 эбийиэги саҥатытан оҥоруохтара, олортон — 30 медицина, 105 үөрэх уонна 25 олох-дьаһах хомунаалынай эбийиэктэрэ.

112 балыыһаҕа уонна 75 училищеҕа саҥа оборуудабанньалары, учууталларга, быраастарга, «Звезда» судоверфь үлэһиттэригэр 1040 кыбартыыраны ылыахтара, ону таһынан 146 тырааныспары атыылаһыахтара.