2021 сылга оскуола аттестатын биэрии быраабылата бигэргэннэ

2021 сылга Россияҕа орто уопсай үөрэхтээһин туһунан аттестаттары биэрии бэрээдэгэ бигэргэннэ. Бу туһунан Россия үөрэҕириигэ министиэристибэтин пресс-сулууспата иһитиннэрэр.

Докумуоҥҥа этиллэринэн, үрдүк үөрэх кыһатыгар туттарсар былаана суох оскуоланы бүтэрээччигэ икки судаарыстыбаннай экзамен түмүгүнэн аттестат бэриллэр. Онуоха нуучча тылыгар уонна математикаҕа «орто» сыанаттан үрдүк көрдөрүү ирдэнэр.

Салгыы үнүбэрсиэткэ үөрэнэ барар былааннаах бүтэрээччи нуучча тылынан биир кэлим экзаменын баала туттарыы алын кээмэйиттэн итэҕэһэ суох буолуохтаах.

2021 сылга аттестаты дистанционно ылар кыах хаалар. Бүтэрээччи көрдөһүүтүнэн оскуола аттестаты почтанан ыытыан, эбэтэр бэйэтэ кэлэн ылар кыаҕа суох буоллаҕына докумуон электроннай копиятын электроннай почтаҕа ыытыан сөп.

Быйыл биир кэлим экзамен сүрүн түһүмэҕэ ыам ыйын 31 күнүттэн от ыйын 2 күнүгэр диэри ыытыллыаҕа. Судаарыстыбаннай түмүктүүр экзаменнар сүрүн түһүмэхтэрэ ыам ыйын 25 күнүттэн бэс ыйын 16 күнүгэр диэри.