2022 сылга бүддьүөт ороскуотун аҥарын социальнай эйгэҕэ тыырыахтара

Үүнэр сылга өрөспүүбүлүкэ судаарыстыбаннай бүддьүөтүн ороскуоттаах чааһын уопсай кээмэйэ 267 миллиард солкуобайга тэҥнэһиэҕэ, олортон аҥара социальнай эйгэни өйүүргэ туһуланыаҕа. Иһитиннэриини быһа эпииргэ СӨ үбүн миниистирэ Валерий Жондоров эттэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

«Федеральнай бүддьүөттэн тус сыаллаах үбүлээһин суотугар ороскуот 43 миллиард солкуобайга тэҥнэһиэҕэ. Ордук 2022 сыл бүддьүөтүн ороскуотугар бастакытын инвестиционнай бырайыактары сайыннарыыга инфраструктурнай бүддьүөт кирэдьииттэрин ылыахпыт. Быйыл дойду бырабыыталыстыбатын иһинэн Марат Хуснуллин салайааччылаах талар хамыыһыйа үлэлээтэ, онно Саха сирэ үс инфраструктурнай бырайыагы көрдөрдө», — диэн үп миниистирин баһылыга бэлиэтээтэ.

Саҥа бүддьүөт биир уратытынан — быйыл тыа хаһаайыстыбатын үбүлээһинэ 12 миллиард солкуобайтан тахса суумаҕа тэҥнэстэ. Үбү сир-уот, тыа-хаһаайыстыбатын субсидиятыгар эрэ буолбакка, инвестицияҕа эмиэ көрүөхтэрэ — хотоннору, сылгы базаларын, сайылыктары, оҕуруот аһын уо.д.а. харайар сирдэри, ону тэҥэ атын эбийиэктэри тутууга.

Итиэннэ, Арктика оҕолорун өйөөһүн туһунан быһаарыыны ыллылар, чуолаан, сайын ыстаадаҕа сылдьар оҕолор сайыҥҥы сынньалаҥнарын тэрийии, «Эдэр табаһыт» бырагырааманы олоххо киллэрии. 2020-2024 сылларга өрөспүүбүлүкэ Хотугу төрүт олохтоох аҕыйах ахсааннаах норуоттарын сайыннарыы бырагырааматынан үбүлээһин 247 мөлүйүөнтэн биир миллиард солкуобайга диэри буолар.

Маны таһынан, бүддьүөт үлэһиттэрин хамнастара үрдүүр сууматыгар көрүллүөҕэ. Миниистир бэлиэтээбитинэн, хамнас икки түһүмэҕинэн үрдүөҕэ: 2022 сыл тохсунньутуттан 3,6%-нан, алтынньыга 2,4%-нан, уопсайа 2022 сылга 6% үрдүөҕэ.

Санатан эттэххэ, Ил Дархан Айсен Николаев иһитиннэрбитинэн, Саха сирэ бэйэ дохуотун кээмэйинэн бастыҥ регионнарга ахсыс миэстэ буолбута. Эһиил бүддьүөт дохуота 264,5 млрд буолуоҕа, оттон ороскуот — 267,6 млрд солкуобайга тэҥнэһиэҕэ.