2022 сылга федеральнай субсидия кээмэйэ 11,7 млрд солкуобайынан үрдүөҕэ

Ил Дархан Айсен Николаев уонна Судаарыстыбаннай Дуума дьокутаата Галина Данчикова үс сыллаах федеральнай бүддьүөт туһунан сокуону, өрөспүүбүлүкэ судаарыстыбаннай бырагыраамаларга уонна национальнай бырайыактарга кыттыытын дьүүллэстилэр. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

«Россия бэрэсидьиэнэ Владимир Путин туһаайан этиитигэр туруорбут соруктарын тула Галина Иннокентевналыын кэпсэттибит. Улахан суолталаах үлэ ыытылынна, бүгүн үтүө түмүктэри көрөбүт. Өрөспүүбүлүкэ социальнай бырагыраамалары олоххо киллэриигэ, үөрэхтээһиҥҥэ, доруобуйа харыстабылыгар уонна култуураҕа федеральнай көмөнү ылыаҕа», — диэтэ Айсен Николаев.

Субсидия куораттар судаарыстыбаннай бырагыраамаларга уонна национальнай сыалы-соругу быһаарыыга кыттыыларын көрдөрөр.

«2021 сылга саха сиригэр субсидия кээмэйэ 20 млрд 800 мөлүйүөн буоллаҕына, 2022 сылга бу суума 32 млрд 500 мөлүйүөн солкуобайга тэҥнэһиэҕэ», — диэтэ Галина Данчикова Ил Дарханныын көрсөн кэпсэтии түмүгэр.

Чуолаан, субсидия сүрүн кээмэйэ тыа сиригэр, оробуочай бөһүөлэктэргэ уонна 50 тыһыынчаҕа тиийэ олохтоох нэһилиэнньэлээх куораттарга, медицина көмөтүн олоххо киллэриигэ, тыа сиригэр үлэлии барар учууталлар төлөбүрдэригэр тыырыллар.

Госдума дьокутаата Галина Данчикова алын кылаастар сылаас аһылыктарыгар үс сыл иһигэр 3 млрд 200 мөлүйүөн кэриҥэ солкуобай көрүллэрин бэлиэтээн эттэ.