2022 сылга Саха сиригэр ОМС пуондатыттан 19 кэриҥэ %-нан үрдүк субвенция түһүөҕэ

2022 сылга медицина булгуччулаах харыстабылыттан өрөспүүбүлүкэҕэ субвенция кээмэйэ 44 миллиард солкуобайтан арыый элбэх буолуоҕа, бу көрдөрүү быйылгыттан 6,9 миллиард солкуобайынан үрдүк, ол эбэтэр 18,9%-нан. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Иһитиннэриини булгуччулаах медицина харыстабылын пуондатын дириэктэрэ Александр Горохов, алтынньы 7 күнүгэр, «2022 сыл уонна 2023-2024 сылга былааннанар бүддьүөт» сокуон бырайыагын билиһиннэрэр өрөспүүбүлүкэ бырабыыталыстыбатын мунньаҕар тириэртэ.

«Субвенция кээмэйин үрдээһинэ, өрөспүүбүлүкэ ситэриилээх уонна сокуону таһаарар уорганнарын булгуччулаах медицина харыстабылын федеральнай пуондатыттан субвенцияны тэрийии ньыматын уларытыытыгар үлэлэрин түмүгэ буолар», — диэн быһаарда.

Дириэктэр этэринэн, Россия доруобуйа харыстабылын министиэристибэтэ коэффициеннарын сыаната 4,5-тэн 5,5-кэ диэри үрдүөхтээх субвенцияны тыырыы ньыматын уларытыы туһунан уураах бырайыагын бэлэмнээтэ.

«Көрдөрүү үрдээтэҕинэ биэс региоҥҥа субвенция кээмэйэ үрдүөҕэ: Магадан уобалаһыгар, Чукотка автономнай уокуругар, Камчатка кыраайыгар, Ненец автономнай уокуругар уонна Саха сиригэр субвенция кээмэйэ улаатыаҕа. Саамай улахан эбиллии биһиги өрөспүүбүлүкэбитигэр — алта миллиард солкуобайтан тахса сууматтан биһиги эбии түөрт миллиард солкуобай субвенцияны ылыахпыт», — диэтэ Александр Горохов.

ОМС территориальнай пуондатыгар бэриллэр өрөспүүбүлүкэ судаарыстыбаннай бүддьүөтүттэн трансферт 1,2 миллиард солкуобай буолуоҕа. Ол түмүгэр, 2022 сылга пуонда дохуотун уопсай кээмэйэ 45 миллиард 545 мөлүйүөн солкуобай буолуоҕа.

Үүнэр сылга сүрүн хайысхаларынан коронавирустаан балыыһаҕа киирбит ыарыһахтарга, онкологическай ыарыылаах дьоҥҥо медицина көмөтүн оҥоруу уонна саҥа кардиологическай диспансеры киллэрии, диспансеризацияны ыытыы буоллулар.

Мунньах кыттыылаахтара сокуон бырайыагын өйөөтүлэр, Ил Түмэн көрүүтүгэр ыытыахтара.