2022 сылга Саха сирин судаарыстыбаннай бүддьүөтүн дохуота 32 млрд солкуобайынан улаатыаҕа

Өрөспүүбүлүкэ 2022 сыллааҕы судаарыстыбаннай бүддьүөтүн дохуотун кээмэйэ 32,292 миллиард солкуобайынан улаатыаҕа уонна 264,535 миллиардка тэҥнэһиэҕэ.

Сэтинньи 30 күнүгэр Ил Түмэн дьокутааттара 2022 сылга уонна 2023-2024 сыллааҕы былааннаах кэмҥэ өрөспүүбүлүкэ судаарыстыбаннай бүддьүөтүн туһунан сокуон барылын дьүүллэстилэр.

Ол курдук, үүнэр сылга Саха сирин судаарыстыбаннай бүддьүөтүн дохуота 264,535 миллиард солкуобайга диэри улаатыаҕа, ороскуот эмиэ үрдүөҕэ — 34,573-тан 267,665 миллиард солкуобайга диэри. Бүддьүөт кэмчилээһинэ 3,129 миллиард солкуобайга тэҥнэһиэҕэ.

2023 сылга көрүллэр үп-харчы кээмэйэ 259,779 миллиард солкуобайга тэҥнэһиэҕэ — 24,826 миллиардынан ордук. Судаарыстыбаннай бүддьүөт уопсай кээмэйэ 26,708-тан — 262,504 миллиард солкуобайга тиийэ улаатыаҕа, кэмчилээһин 2,730 миллиард солкуобай буолуоҕа.

2024 сылга өрөспүүбүлүкэ бүддьүөтүн дохуота 60,342 миллиард солкуобайынан улаатыаҕа уонна 252,853 миллиард солкуобайга тэҥнэһиэҕэ, итиэннэ ороскуот 253,851 миллиард солкуобайга тиийэ үрдүөҕэ.

Саха сирин судаарыстыбаннай бүддьүөтүн бырайыагын, сэтинньи 30 күнүгэр, иккис уонна бүтэһиктээх ааҕыыга ылыннылар.