2022 сылга тыа сирин сайдыытыгар 1,2 млрд солк. тахса сууманы ыытыахтара

«Тыа сирин комплекснай сайдыыта» бырагырааманан өрөспүүбүлүкэ сэлиэнньэлэрин тупсаран оҥорууга 1,249 миллиард солкуобайтан тахса сууманы федеральнай бүддьүөттэн ыытыахтара. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.

Сэтинньи 8 күнүгэр СӨ Бырабыыталыстыбатын бэрэссэдээтэлэ Андрей Тарасенко Россия тыатын хаһаайыстыбатын миниистрин Оксана Луту кытта көрүстэ. Өрүттэр тыа сирин кэлимник сайыннарыы бырагырааматын олоххо киллэрии хаамыытын дьүүллэстилэр.

2021 сылга бырагырааманы олоххо киллэриигэ 1, 996 мөлүйүөн солкуобай көрүллүбүтэ, ол иһигэр федеральнай бүддьүөттэн 1,894 мөлүйүөн солкуобай.

«Быйыл 20 ыал олорор дьиэни тутууга субсидия ылбыттар. Эдэр исписсиэлистэргэ олорор дьиэлэр наймыга Нам, Мэҥэ Хаҥалас оройуоннарыгар тутуллаллар. Билигин Чурапчыга «Сайдыы», Намҥа «Мымах» олорор кыбаарталлар тутуу барар», — диэтэ Андрей Тарасенко.