Ааспыт сууккаҕа эбии 103 киһи коронавирустаабыт

Саха сиригэр ааспыт сууккаҕа 103 киһи эбии коронавирустаабыта бигэргэннэ.

Бу туһунан бүгүн, ыам ыйын 6 күнүгэр, өрөспүүбүлүкэтээҕи суһал штаб салайааччытын солбуйааччы Ольга Балабкина брифинг кэмигэр иһитиннэрдэ.

Кини этэринэн, элбэх киһи Дьокуускай куоракка (58) уонна Мэҥэ Хаҥаласка ыалдьыбыт (13).

«Мэҥэ Хаҥаласка балаһыанньа ыарахан, онон куттала суох буолуу миэрэлэрин тутуһуу бастакы туруохтаах. Бэҕэһээ улууска вакцина саҥа баартыйата ыытылынна, бырааһынньыктар кэмнэригэр быһыыны оҥорор лабораториялар үлэлиэхтэрэр», — диэтэ Ольга Балабкина.

Маны таһынан, Бүлүү улууһугар ыалдьыбыт дьон ахсаана элбээбитин бэлиэтээтэ — сэттэ түбэлтэ бигэргэннэ.

Горнайга, Чурапчыга түөртүү киһи коронавирустаата, Аммаҕа уонна Сунтаарга — үстүү, Алдаҥҥа, Нерюнгригэ, Муомаҕа уонна Намҥа — иккилии.

Кэбээйигэ, Ньурбаҕа уонна Өймөкөөҥҥө биирдии киһи COVID-19-нан ыарыйда.