«Айар» кинигэ кыһата «Ревизор» куонкурус кыайыылааҕа буолла

«Айар» национальнай кинигэ кыһата Москваҕа ыытыллыбыт «Ревизор» X-c үбүлүөйдээх профессиональнай сатабыл куонкуруһугар «Инновационный книжный проект» анал аакка кыайыылааҕынан таҕыста. 

«Биһиги кыһабыт “кинигэ Оскарын” ылла. Ону тэҥэ биһигини Россия кинигэ дьыалатын сайдыытыгар кылаатын иһин анал дипломунан наҕараадалаатылар», – диэн хампаанньа генеральнай дириэктэрэ Август Егоров эттэ.

Профессиональнай сатабыл куонкуруһа «Ревизор» — бу кинигэ эйгэтигэр сыллата ыытыллар күрэх. Манна кинигэ таһаарыыга, тарҕатыыга уонна библиотека дьыалатын баһылаабыт хампаанньалар кытталлар.

Маны таһынан, «Книга года» дойду сүрүн куонкуруһугар Георгий Гупало көҕүлээбит, Елена Киричек уонна Иван Панченко суруйбут «Неизвестное Солнце. Чудеса. Факты. Загадки. Расследование» Non-fiction анал аакка сүрүн бирииһи ылла. 

«Биһиги холбоһуктаах бырайыакпыт “Неизвестное солнце” Non-fiction анал аакка лауреат буолла. Ааспыт сылга бу анал аакка биһиги “Саха тымныыта” энциклопедиябыт эмиэ лауреат буолбута. Дойду кинигэ сүрүн куонкуруһугар иккис сылын субуруччу кыттар ыарахан диэххэ сөп. Георгий Гупалоҕа, РАН пулковскай астрономическай обсерваториятыгар уонна төрөөбүт кэлэктииппэр улахан махталбын тиэрдэбин», – диэтэ Август Егоров.