Айсен Николаев: Көҥүл тустуу көрдөрүүтүн тупсарарга үлэлэһиэхпит

Казахстаҥҥа ыытыллыбыт көҥүл тустуу аан дойдутааҕы чемпионатыгар саха спортсменнара сөптөөх көрдөрүүнү ситиспэтилэр. Бу туһунан Ил Дархан Айсен Николаев «Быһа линия» кэмигэр иһитиннэрдэ.

«Нур-Султан куоракка аан дойдутааҕы чемпионакка биһиги бөҕөстөрбүт кыттыыларыттан санаабыт түстэ. Виктор Лебедев кэнниттэн үрдүк көрдөрүүнү ситиспэтэхтэрэ ыраатта», — диэтэ Ил Дархан.

Айсен Николаев эппитинэн, көҥүл тустууга атын регионнартан тренердэри, сүбэһиттэри ыҥырыахтарын сөп.

Ил Дархан Саха сириттэн Олимпийскай оонньууларга кыттыы туһунан санаатын үллэһиннэ. Ол курдук Кристина Устинова Россия чемпионатыгар ситиһиилээхтик кыттан, оҕунан ытыыга сүүмэрдэммит хамаандаҕа киирэригэр эрэнэрин туһунан иһитиннэрдэ.

Ону таһынан Москватааҕы лаборатория уонна РУСАДА тула айдаан Саха сирин спортсменкатын Сардаана Тимофееваны хаарыйбата диэтэ. Спортсменка Чэпчэки атлетика федерацияларын аан дойдутааҕы түмсүүлэрин эгидатынан ыытыллар күрэхтэһиигэ кыттарга көҥүл ылбыт.

Айсен Николаев ону таһынан боксер Василий Егоров Токиоҕа ыытыллар Олимпиадаҕа путевка ылыан сөп диэтэ.

«Василий күрэхтэһиилэри ааһыахтаах. Онно дьэ тыҥааһыннаах күрэхтэһиилэр. Ол эрээри Василий Олимпиадаҕа ааһыахтаах соругун толоруо диэн эрэнэбин. Барыта бэйэтиттэн тутулуктаах. Өрөспүүбүлүкэ кинини өйүүр», — диэн Ил Дархан эттэ.