Айсен Николаев үс миниистири солбуйааччыны анаата

Ил Дархан Айсен Николаев тыа хаһаайыстыбатын уонна инновация миниистирдэрин солбуйааччыларын анаата.

Бу туһунан иһитиннэриини бэйэтин Telegram-ханаалыгар таһаарда.

Ол курдук, СӨ инновация, цифровой сайдыы уонна инфокоммуникационнай технология миниистирин бастакы солбуйааччытынан Петр Николаев ананна. Кини 2011 сылтан министиэристибэ састаабыгар баар, судаарыстыбаннай уонна муниципальнай өҥөлөрү электроннай көрүҥҥэ көһөрүүгэ үлэлэспитэ. Петр Николаев салалтатынан Дааннайы обработкалыыр судаарыстыбаннай кииннэр тэриллибиттэрэ, салайыы хаамыытыгар бастыҥ технологиялар олоххо киирбиттэрэ.

Миниистири солбуйааччынан Суслов Андрей Владимирович ананна. Кини «Ростелеком» дириэктэрин солбуйааччытынан үлэлээбитэ. 2017-тэн 2019 сылга диэри «Почты России» филиалын салайбыта. Дуоһунаска ананыаҕар диэри регионнар икки ардыларынааҕы уматык хампаанньатын генеральнай дириэктэринэн үлэлээбитэ.

Тыа хаһаайыстыбатын миниистирнин солбуйааччытынан Артем Александрову анаатылар. Бу иннинэ кини СӨ тыа хаһаайыстыбатын министиэристибэтин сүөһү иитиигэ уонна племенной үлэҕэ департаменын салайааччытынан үлэлээбитэ.