Айсен Николаев «Якутия 24» ханаалга «Путь Го» биэрии бастакы ыалдьытынан буолуоҕа

Ил Дархан Айсен Николаев бүгүн, ыам ыйын 14 күнүгэр «Якутия 24» ханаалга «Путь Го» саҥа биэрии бастакы ыалдьытынан буолуоҕа.

Ил Дархан Го оонньууга бэйэтин уопутун, саамай былыргы остуол тактическай оонньууларыттан биирдэстэрэ тугунан тардарын кэпсиэҕэ. «Го-2021» 41-с аан дойдутааҕы чемпионат тэрийэр кэмитиэтин чилиэнин быһыытынан, бу оонньуу Саха сиригэр сайдыытын уонна өрөспүүбүлүкэ оонньооччуларын ситиһиилэрин туһунан сырдатыаҕа.

Көрөөччүлэр бу көрүҥ оонньууну кытта билсиэхтэрэ, чемпионат дириэктэрэ, инструктор Михаил Емельянов маастар-класс ыытыаҕа уонна оонньуу быраабылаларын быһаарыаҕа.

«Путь Го» биэрии хас бээтиниссэ ахсын олохтоох бириэмэнэн 20.45 чааска тахсар.

«Го» – 2-5 тыһ. сыл. анараа өттүгэр Кытайга үөскээбит, дириҥ стратегическай ис хоһоонноох логическай остуол оонньуута. Аан дойдуга биир саамай киэҥник тарҕаммыт остуол оонньууларыттан биирдэстэринэн буолар уонна аан дойдутааҕы интеллектуальнай оонньуулар биэс базовай дисциплинэлэрин кэккэтигэр киирэр.

2021 сылга Россия — чемпионат 40 сыллааҕы историятын тухары, аан дойду чемпионатын ылынар бастакы европейскай дойду буолуоҕа. 77 дойду бэрэстэбиитэлэ кыттыылаах бэстибээл бэс ыйын 4-9 күннэригэр Владивостокка ыытыллар.