Алдаҥҥа ойуур хаһаайыстыбатын салайааччыта 25 тыһ. солк. ыстарааптанна

НВК САХА — Алданнааҕы ойуур хаһаайыстыбатын салайааччыта ойуур баһаарын умуруорар үлэни сөптөөх кэмигэр ыыппатаҕын иһин 25 тыһыынча солкуобайга ыстарааптанна. Бу туһунан өрөспүүбүлүкэ борокуратууратын пресс-сулууспата иһитиннэрэр.

Атырдьах ыйын 1 күнүгэр Алдаҥҥа саҥа ойуур баһаара регистрацияламмыт. 12 күн иһигэр уот 146 га иэннээх сиргэ тарҕаммыт.

Өрөспүүбүлүкэҕэ баһаары умуруорууга ыытыллар үлэтин быраабылатыгар олоҕуран, Алдан ойуурун хаһаайыстыбата кэмигэр үлэни тэрийбэтэх.

Бааһаары умуруорар үлэ 9 күн хойутаан саҕаламмыт диэн бэлиэтэнэр. Ону таһынан, авиаотделение үлэһиттэрэ уонна былаанынан көрүллэр туһааннаах анал тиэхиньикэ үлэҕэ тардыллыбатах.

Алдан улууһун борокуратуурата ойуур хаһаайыстыбатын салайааччытыгар 25 тыһыынча солкуобай ыстараап анаата уонна административнай дьыала тэрийдэ.