АЛРОСА 2025 сылга «Майское» саппаас баайдаах сиргэ алмааһы хостооһуну саҕалыа

«АЛРОСА» аксионернай хампаанньа 2025 сылга Ньурба улууһугар баар «Майское» саппаас баайдаах сиргэ алмааһы хостооһуну саҕалыыры былаанныыр. Бу туһунан Nedra.DV иһитиннэрэр.

Сүрүн судаарыстыбаннай экспертиза алмааһы хостуур хапытаалынай хайаны байытар учаастагы тутуу бырайыагын сметэтин бигэргэттэ.

АЛРОСА «Майскай» карьеры 77,5 миэтэрэ дириҥҥэ диэри хаһар былааннаах. 2020-2024 сылларга хостонор боруода уопсай кээмэйэ 12 мөлүйүөн кубометр кэриҥэ буоллара ааҕыллар.

«Хампаанньа хостооһуҥҥа 2025 сылга киирэри, 2027 сылтан — сылга 300 тыһыынча туонна руданы хостуур бырайыактыыр кыамтаҕа тахсары былаанныыр. Оҥоруу чугастыы баар Ньурбатааҕы хайаны байытар кэмбинээккэ ыытыллыаҕа», — диэн этиллэр.

Бырайыактанар учаастак Ботуобуйатааҕы карьертан үс килэмиэтир, Ньурбатааҕы карьертан биэс аҥаар килэмиэтир тэйиччи баар. Эбийиэк уопсай саппааһа 12,7 мөлүйүөн карат алмааһынан сыаналанар.