АЛРОСА Россия историятыгар саамай улахан кырыыламмыт алмааһы атыылыаҕа

АЛРОСА хампаанньа Женева куоракка саамай улахан, кырыыламмыт 100,94 караттаах алмааһы аукциоҥҥа таһаарыаҕа. Бу туһунан хампаанньа пресс-сулууспата иһитиннэрэр.

«АЛРОСА хампаанньа Россия историятыгар саамай улахан 100,94-караттаах The Spectacle кырыыламмыт алмааһы билиһиннэрэр. Саамай үрдүк көрдөрүүлээх, ыраас алмаас Christie’s Magnificent Jewels аукциоҥҥа ыам ыйын 12 күнүгэр тахсыаҕа», — диэн иһитиннэриигэ этиллэр.

2016 сыллаахха «Зарница» көмүс хостуур сиртэн булуллубут 207,29 карат ыйааһыннаах алмаастан кырыылаан таһаарбыттар. XXI-с үйэҕэ АЛРОСА хостообут үрдүк хаачыстыбалаах саамай улахан кристала буолар.

Хампаанньа исписэлиистэрэ алмааһы 1,5 сыл устата кырыылаатылар. «Изумруд» быһыынан кырыыламмыт алмааһы GIA экспертэрэ ырааһынан уонна дьүһүнүнэн үрдүк сыанабылы биэрдилэр.