Арктика социальнай урбаанньыттара 1 мөл.солк. диэри грант ылыахтарын сөп

Социальнай эйгэ субъектара өрөспүүбүлүкэ арктическай оройуоннарыгар РФ бэрэсидьиэнэ Владимир Путин көҕүлээбит «Аччыгый уонна орто урбааны өйүүр» национальнай бырайыак чэрчитинэн мөлүйүөҥҥэ диэри граны ылыахтарын сөп. Бу туһунан СӨ үлэҕэ уонна социальнай сайдыыга министиэристибэтин пресс-сулууспата иһитиннэрэр.

«2021 сылга дьоҕус уонна орто урбаан биир кэлим реестригэр киирбит социальнай тэрилтэлэргэ 500 тыһыынча солкуобай суумалаах, биир кэмнээх граннары биэрии былааннанар. Арктика оройуоннара, бырайыактары олоххо киллэриигэ урбаанньыты 100 % үбүлүүр усулуобуйаҕа, биир мөлүйүөн солкуобайга диэри суумалаах граны ылар кыахтаахтар», — диэн иһитиннэриигэ этиллэр.

Дьоҕус уонна орто урбаан субъектара маннык субсидияҕа киирсиэхтэрин сөп: табаары оҥорон таһаарыы уонна өҥөнү оҥоруу эйгэтигэр үлэлиир инбэлиит (I уонна II бөлөх); инбэлиит, кырдьаҕас уонна ыарахан быһыыга-майгыга түбэспит дьиэтэ-уота суох дьону көрөр социальнай урбаан субъектара.

2021 сыл муус устар 30 күнүгэр диэри социальнай тэрилтэ статуһун ылыыга докумуоннары ылыы буолуоҕа.