Артур Пахомовка Россия физическэй култууратын үтүөлээх үлэһитэ ааты иҥэрдилэр

Буоксаҕа өрөспүүбүлүкэ сүрүн тренеригэр Артур Пахомовка РФ физическэй култууратын үтүөлээх үлэһитэ аат иҥэрилиннэ. Бу туһунан Спорт Якутии иһитиннэрдэ.

Ону таһынан В.П. Керемясов аатынан Дьокуускай куорат 3 №-дээх олимпийскай эрэллэри бэлэмниир успуорт оскуолатын дириэктэригэр Федот Соловьевка эмиэ бу курдук үрдүк ааты иҥэрдилэр.

Ыспыраапка:

Артур Пахомов 1954 сыллаахха олунньу 16 күнүгэр Ньурба улууһун Антоновкатыгар төрөөбүтэ. Дьокуускайдааҕы 1№-дээх педагогическай училищены уонна Саха судаарыстыбаннай үнүбэрситиэтин бүтэрбитэ.

1979 сылтан тренер быһыытынан үлэлээбитэ. Үгүс сыл устата Дьокуускайдааҕы успуорт оскуолатыгар уонна Успуорт үрдүкү маастарыстыбатын оскуолатыгар тренердээбитэ.

Тренердиир сылларыгар аан дойдутааҕы кылаастаах успуорт икки маастарын, СССР уонна Россия 12 успуорт маастарын, успуорт маастарыгар 20 хандьыдааты бэлэмнээн кэллэ.

Кини биллэр-көстөр иитиллээччилэриттэн биирдэстэрэ — успуорт үтүөлээх маастара, Пекиҥҥэ буолбут Олимпийскай оонньууларга боруонса призерэ, Европа үс төгүллээх чөмпүйүөнэ, аан дойдутааҕы чөмпүйэнээт боруонса мэтээлин хаһаайына Георгий Балакшин уонна успуорт үтүөлээх маастара, Европа икки төгүллээх чөмпүйүөнэ, аан дойдуга бастыыр иһин күрэхтэһии үрүҥ көмүс призерэ, Рио-де-Жанейроҕа ыытыллыбыт Олимпийскай оонньуулар кыттыылааҕа Василий Егоров.

Федот Соловьев Краснодардааҕы физическэй култуура судаарыстыбаннай үнүбэрситиэтин бүтэрбит. В.П. Керемясов аатынан Дьокуускай куорат 3 №-дээх олимпийскай эрэллэри бэлэмниир успуорт оскуолата тэриллиэҕиттэн, үлэлээбитэ 20-тэн тахса сыл буолла.

Бу сыллар тухары оскуола оҕолоро тыһыынчанан мэтээллэри ылан кэллилэр. Соловьев — маастар бэтэрээннэр ортолоругар тустууга аан дойду чөмпүйүөнэ, Россияҕа бэтэрээннэргэ үс төгүл чөмпүйүөн, Саха сиригэр тустуук бэтэрээннэргэ аҕыста чөмпүйүөннээбитэ.